Заказнік-журавіннік (з 2020 г. рэспубліканскі заказнік) "Фаліцкі Мох" быў створаны ў Старадарожскім раёне Мінскай вобласці ў 1979 г. Мэтай заснавання стала зберажэнне ў прыродным стане месцаў росту журавін.

Ахоўная тэрыторыя плошчай больш за 3 тыс. га размешчана на аднайменным балоце вярховага і пераходнага тыпаў. У складзе расліннасці пераважаюць хваёва-сфагнавыя і кусцікава-сфагнавыя фітацэнозы. Асноўнай лесаўтваральнай пародай з’яўляецца хвоя. Маюцца таксама нязначная колькасць бярозавых, дубовых, яловых і чорнаалешнікавых насаджэнняў. Флора налічвае 482 віды сасудзістых раслін. Сярод рэдкіх відаў сустракаюцца баранец звычайны, вярба чарнічная, тайнік яйцападобны, аўсяніца высокая. Жывёльны свет прадстаўлены 77 відамі наземных пазваночных, з якіх барсук, шэры журавель і беласпінны дзяцел унесены ў Чырвоную кнігу Рэспублікі Беларусь.

Заказнік з’яляецца аб’ектам экалагічнага турызму. Для наведвальнікаў праводзяцца эскурсіі, абсталяваны месцы для адпачынку і экалагічная сцежка. У вызначаныя тэрміны дазволены збор журавін і паляванне.

Матэрыял падрыхтаваны ў 2023 г.