Беларускі дзяржаўны медыцынскі каледж – адна з вядучых у нашай краіне навучальных устаноў, якая рыхтуе спецыялістаў з сярэдняй медыцынскай адукацыяй. Каледж мае больш чым паўвекавую гісторыю. 1 кастрычніка 1953 г. на базе Мінскага медыцынскага інстытута была адкрыта фельчарская школа з трохгадовым тэрмінам навучання, дзе пачалі рыхтаваць медыцынскіх сясцёр, фельчараў, зубных тэхнікаў. У 1954 г. выйшла пастанова СНК БССР “Аб рэарганізацыі сярэдніх медыцынскіх і фармацэўтычных школ Міністэрства аховы здароўя БССР у медыцынскія вучылішчы”. У мэтах уніфікацыі сярэдняй медыцынскай адукацыі і павышэння якасці падрыхтоўкі кадраў фельчарская школа атрымала статус самастойнай установы адукацыі “Мінскае медыцынскае вучылішча №2”, якое стала рыхтаваць кадры для Мінска на базе паліклінікі Мінскага трактарнага завода.

У 1965 г. установа атрымала ўласны будынак на вул. Стаханаўская, 10, дзе размяшчалася да 1979 г. У гэты перыяд было арганізавана аддзяленне ўдасканалення і спецыялізацыі сярэдніх медыцынскіх работнікаў па асноўных спецыяльнасцях. Новы будынак быў узведзены ў 1980 г. у маляўнічым раёне Мінска па Слуцкай шашы. У той час Мінскае медыцынскае вучылішча №2 з'яўлялася адным з самых буйных не толькі ў Беларусі, але і ў СССР.

У верасні 2001 г. на падставе загаду Міністэрства аховы здароўя Рэспублікі Беларусь ад 3 жніўня 2001 г. №214 вучылішча пераўтворана ва ўстанову адукацыі “Беларускі дзяржаўны медыцынскі каледж”. У гэты час удасканальваецца матэрыяльна-тэхнічная база, ствараецца інтэрнэт-сайт каледжа, уводзіцца новая спецыяльнасць – “Медыка-рэабілітацыйная справа”, з 2011 г. – “Фармацыя”. Сёння ў навучальнай установе падрыхтоўка кадраў ажыццяўляецца на базе агульнай сярэдняй адукацыі па спецыяльнасцях: “Сястрынская справа”, “Лячэбная справа”, “Медыка-рэабілітацыйная справа”, “Зубапратэзная справа” (у тым ліку рыхтуюцца зубныя тэхнікі з ліку навучэнцаў з асаблівасцямі псіхафізічнага развіцця), “Фармацыя”. У каледжы было адкрыта аддзяленне павышэння кваліфікацыі і перападрыхтоўкі кадраў сярэдняга медыцынскага і фармацэўтычнага персаналу. Усяго ва ўстанове навучаецца больш за 1 500 навучэнцаў, у тым ліку грамадзяне не толькі Рэспублікі Беларусь, але і з краін блізкага і далёкага замежжа. Пасля заканчэння многія з іх працягваюць адукацыю ў вышэйшых навучальных установах.

Адміністрацыя клапоціцца аб тэхнічным аснашчэнні вучэбных заняткаў: ёсць камп'ютарныя класы, падключаныя да інтэрнэту, закупляюцца трэнажоры, фантомы, муляжы, з дапамогай якіх навучэнцы адпрацоўваюць розныя маніпуляцыі. Вучэбныя і практычныя заняткі, дзякуючы прафесарска-выкладчыцкаму калектыву, адбываюцца на высокім тэхнічным узроўні. Выкладчыкамі каледжа праводзіцца вялікая работа па адаптацыі новых навучальных праграм, прывядзенні іх у адпаведнасць з патрабаваннямі кваліфікацыйных характарыстык.

Сёння Беларускі дзяржаўны медыцынскі каледж захоўвае лепшыя традыцыі мінулага, а падрыхтоўка спецыялістаў сярэдняга медыцынскага звяна яшчэ больш удасканальваецца.

Матэрыял падрыхтаваны ў 2013 г.