Гісторыя шматпрофiльнага прадпрыемства па выпуску пiва i безалкагольнай прадукцыi, адкрытага акцыянернага таварыства “Брэсцкае пiва”, пачалася ў 1967 г., калі быў пабудаваны Брэсцкі піваварна-вінаробны камбінат. У 1970 г. быў здадзены ў эксплуатацыю ўчастак па вытворчасці віна і адбылося ўрачыстае адкрыццё прадпрыемства. Тады ж разлілі першую партыю вінаграднага віна “Партвейн Таўрычаскі”. Вытворчасць піва “Жыгулёўскае” і безалкагольных напояў “Хлебны квас”, “Сітро”, “Ліманад”, “Дзюшэс” пачалася ў 1971 г. З 1972 г. сталі вырабляць солад – сыравіну для піваварнай вытворчасці. Першапачаткова колькасць працоўнага персаналу камбіната складала 202 чалавекі. Першым дырэктарам камбіната быў П. М. Гайбовіч.

У 1990 г. побач з тэрыторыяй прадпрыемства была прабурана свідравіна з мінеральнай вадой глыбінёй 1290 м. У 1993 г. завяршыліся работы па яе абсталяванні і распачата вытворчасць лячэбна-сталовай мінеральнай вады “Брэсцкая-5”, якая ў 2009 г. была прызнана лепшым прадуктам года ў намінацыі “Мінеральная вада лячэбна-сталовая газіраваная”.

У 1990–1998 гг. на камбінаце былі створаны новыя склады, рэканструявана кваснае аддзяленне, уведзены лабараторыя радыялагічнага кантролю, лініі па вытворчасці напіткаў тыпу “Туці-Фруці”, аўтаматычная лінія па разліве безалкагольных напояў у пластыкавыя 1,5-літровыя бутэлькі і інш. Практычна ўсе тэхналагічныя працэсы на камбінаце аўтаматызаваны і механізаваны.

У 2004–2010 гг. праведзена поўная рэканструкцыя прадпрыемства, у выніку якой камбінат ператварыўся ў буйнога сучаснага піваварнага вытворцу, якасць прадукцыі якога не саступае еўрапейскім аналагам.

Зараз прадпрыемства выпускае 10 гатункаў піва, 6 відаў мінеральнай вады, 20 найменняў безалкагольных і слабаалгакольных напояў, моцныя пладовыя напоі, вінныя вінаградныя напоі, віны, солад піваварны, хлебны квас. За сваю высокую якасць прадукцыя камбіната неаднойчы атрымлівала на міжнародных дэгустацыях залатыя, сярэбраныя і бронзавыя медалі.

Матэрыял падрыхтаваны Брэсцкай абласной бібліятэкай імя М. Горкага ў 2011 г.