Кінакрытык, журналіст Ала Пятроўна Бабкова нарадзілася ў Мінску. У 1962 г. скончыла Маскоўскі дзяржаўны ўніверсітэт імя М.В. Ламаносава. Працоўная дзейнасць пачалася на беларускім тэлебачанні: з 1962 па 1990 г. яна працавала рэдактарам, займала пасаду загадчыка аддзела галоўнай рэдакцыі кінапраграм і літаратурна-драматычнай рэдакцыі, працавала ў творчым аб'яднанні «Тэлефільм».

У 1960–1970-я гг. А. Бабкова з'яўлялася аўтарам, рэдактарам і вядучай тэлепраграм «Экран і час» («24 кадры ў секунду»), «Майстры беларускага кіно», «Кінаафіша» і інш. У 1981–1983 гг. кінакрытык вяла рубрыку «Універсітэт эстэтычных ведаў» у газеце «Чырвоная змена», у 1992–2001 гг. – рубрыку «Ілюзіён» у газеце «Вячэрні Мінск». З 1990 па 1997 г. з'яўлялася сакратаром па прэсе і інфармацыі Беларускага саюза кінематаграфістаў. Ала Пятроўна – складальнік біяфільмаграфічнага каталога «Белорусское кино: молодые режиссёры» (1999). Зборнік прысвечаны маладым кінематаграфістам, выпускнікам Беларускай акадэміі мастацтваў сярэдзіны 1990-х гг.

Матэрыялы Алы Бабковай, прысвечаныя кінамастацтву Беларусі і краін блізкага замежжа, рэгулярна з’яўляюцца ў перыядычным друку Беларусі і Расіі з 1963 г. Сёння А.П. Бабкова даследуе кінасацыялогію і сучасны кінапрацэс Беларусі, Латвіі, Літвы, Эстоніі, краін СНД. Яе матэрыялы друкуюцца ў часопісах «На экранах», «Мастацтва» і іншых выданнях. Артыкулы кінакрытыка адрозніваюцца прафесіяналізмам і актуальнасцю. Вынікі працы Алы Бабковай неаднаразова былі адзначаны прэміямі Беларускага саюза кінематаграфістаў (1979, 1996, 2001).

Матэрыял падрыхтаваны ў 2012 г.