Мікалай Кузьміч Гарбанёў нарадзіўся 14 мая 1922 г. у с. Папоўка Расашанскага раёна Варонежскай вобласці (Расія) у сям'і служачага. З дзяцінства марыў стаць настаўнікам. Вучыўся выдатна, цікавіўся рознымі дысцыплінамі, любіў чытаць, але найбольш прываблівалі юнака дакладныя навукі. Скончыўшы няпоўную сярэднюю школу, паступіў у педагагічнае вучылішча, пасля – на фізіка-матэматычны факультэт Варонежскага настаўніцкага інстытута.

Пачатак вайны застаў дзевятнаццацігадовага юнака за падрыхтоўкай да дзяржаўнага экзамену. Гэта быў апошні экзамен напярэдадні атрымання дыплома. Ён паспеў атрымаць дыплом, але настаўнічаць не давялося: замест школы быў накіраваны ў Харкаўскае артылерыйскае вучылішча. Курсантаў вучылі ў паскораным рэжыме, імкнучыся даць як мага больш ведаў за кароткі час. Падрыхтоўка была шматбаковая – пры неабходнасці любы курсант павінен быў станавіцца наводчыкам, страляць, зараджаць зброю. Для навядзення гарматы патрэбны і добрыя матэматычныя здольнасці, і інтуіцыя, і ўменне хутка арыентавацца ў зменлівых абставінах. Першае баявое хрышчэнне курсант М.К. Гарбанёў прыняў пад Пуціўлем (Украіна). Калі фронт стабілізаваўся, яго разам з іншымі накіравалі працягваць вучобу ў Фергану (Узбекістан). У 1942 г. пасля заканчэння вучылішча маладога лейтэнанта накіравалі на Паўночна-Заходні фронт у 28-ю стралковую дывізію. За паспяховае вядзенне баявых дзеянняў пад Старой Русай М.К. Гарбанёў быў узнагароджаны медалём “За адвагу”. У 1943 г. быў цяжка паранены. Пасля шпіталя стаў камандзірам батарэі 350-га асобнага знішчальнага процітанкавага дывізіёна (294-я стралковая дывізія 52-й арміі 2-га Украінскага фронту). Асабліва вызначылася батарэя М.К. Гарбанёва каля с. Свідавок (Чаркаская вобласць, Украіна): было знішчана 5 танкаў, штурмавая гармата і каля 2 узводаў салдат праціўніка. За гэту аперацыю ў 1944 г. яму было прысвоена званне Героя Савецкага Саюза. Паведамленне пра высокае званне 22-гадовага камбата застала ўжо ў Румыніі, дзе ён удзельнічаў у вызваленчых баях. Потым прымаў удзел у вызваленні Польшчы і Германіі.

Скончылася вайна, але з перамогай не скончылася вайсковая служба М.К. Гарбанёва. Да 1951 г. ён вучыўся ў Ваеннай акадэміі бранятанкавых і механічных войск імя Р.Я. Маліноўскага. Доўгі час працаваў у штабе арміі на розных камандных пасадах. З 1951 г. кіраваў штабам Цэнтральнай групы савецкіх войск у Аўстрыі. У 1955 г. быў накіраваны ў Беларусь, дзе камандаваў танкавым палком у Барысаве, з 1961 г. стаў начальнікам штаба танкавай дывізіі Беларускай ваеннай акругі, а ў 1967 г. камандаваў мотастралковай дывізіяй Закаўказскай ваеннай акругі. У 1974 г. генерал-маёру М.К. Гарбанёву прапанавалі пасаду начальніка Казанскага сувораўскага вучылішча. Мара аб педагагічнай рабоце ўсё ж такі здзейснілася. Амаль дзесяць гадоў аддаў ён навучальнай установе. Пасля выхаду на заслужаны адпачынак М.К. Гарбанёў пераехаў на пастаяннае месца жыхарства ў Мінск. Тут ён вёў патрыятычную работу, працаваў у рэспубліканскім штабе Грамадзянскай абароны БССР. Подзвігі генерал-маёра, Героя Савецкага Саюза адзначаны ордэнамі і медалямі. У 2003 г. ён стаў ганаровым грамадзянінам г. Росаш (Расія).

Матэрыял падрыхтаваны ў 2012 г.