Мінскі камбінат хлебапрадуктаў – найбуйнейшае прадпрыемства па перапрацоўцы збожжа і вытворчасці мукі і макаронных вырабаў у Беларусі. Заснаваны ў 1946 г. як млынкамбінат № 5. Прадпрыемства паступова пашыралася: у 1958 г. да яго былі далучаны ўсе млынавыя прадпрыемсты і базы Мінска, а ў 1961–1968 гг. пабудаваны 2-гі вытворчы комплекс. У 1967 г. камбінат узнагароджаны ордэнам Працоўнага Чырвонага сцяга. З 1975 г. прадпрыемства стала называцца Мінскі камбінат хлебапрадуктаў, а ў 1994 г. атрымала статус адкрытага акцыянернага таварыства і сучасную назву. У 2004 г. у яго склад увайшоў філіял – сельскагаспадарчы комплекс «Астрашыцы». Камбінат вырабляе пшанічную і жытнюю муку ўсіх сартоў, манную, жытнюю, ячную, пшанічную крупы, пшанічныя зародкавыя шматкі, харчовае вотруб’е, мучныя сумесі, крупы, макароны і інш. Прадукцыя прадаецца пад гандлёвай маркай «Столичная мельница», якая створана ў 2007 г. Усе вырабы, якія выпускаюцца камбінатам, адпавядаюць міжнародным стандартам якасці. У 2010–2011 гг. прадпрыемствам рэалізаваны інвестыцыйныя праекты «Изменение технологической схемы размольного отделения мельницы двухсортного помола ржи с заменой технологического и аспирационного оборудования» і «Реконструкция склада готовой продукции с надстройкой третьего этажа и установкой линии по производству короткорезанных макаронных изделий». Прадпрыемства адзначана ўзнагародай конкурсу «Брэнд года 2008», прэміяй «Лепшыя тавары года» (2009).

Асноўныя спажыўцы прадукцыі – камунальнае ўнітарнае прадпрыемства «Мінскхлебпрам», кандытарскія фабрыкі «Слодыч» і «Камунарка», прадпрыемствы гандлю і грамадскага харчавання Беларусі, арганізацыі хлебапячэння Санкт-Пецярбурга, Ленінградскай, Калінінградскай і Яраслаўскай абласцей Расіі.

Матэрыял падрыхтаваны ў 2020 г.