Бабруйскі мясакамбінат, ААТ

Дата пачатку: 1931 Бабруйск, г., Магілёўская вобласць

Кароткая даведка: адкрытае акцыянернае таварыства

Назвы на іншых мовах: Bobruisk Meat Processing Plant (англійская); Бобруйский мясокомбинат (руская);

ААТ «Бабруйскі мясакамбінат» – адно са старэйшых прадпрыемстваў Бабруйска.

Бабруйскі мясакамбінат быў створаны па загадзе наркама харчовай прамысловасці ў 1931 г. на базе бойні гарадской управы і каўбаснай фабрыкі арцелі інвалідаў. У 1932 г. на прадпрыемстве быў пабудаваны склад для гатовых каўбасных вырабаў, у 1935 г. – піражковы цэх. З цягам часу было абсталявана памяшканне для засолкі і паспявання вэнджаніны, пабудавана ледасховішча і перадубойная база для ўтрымання жывёлы, вялася рэканструкцыя забойнага цэха, набыта камера для ахалоджвання мяса.

Да 1941 г. прадпрыемства выпрацоўвала 5 тыс. тон мяса і 800 тон каўбасных вырабаў штогод. У час Вялікай Айчыннай вайны прадпрыемства спынілася, многія яго супрацоўнікі адправіліся на фронт. Нягледзячы на тое, што большасць абсталявання і цэхаў былі знішчаны, 1 ліпеня 1944 г. Бабруйскі мясакамбінат аднавіў сваю працу.

У 1947 г. пачалося будаўніцтва новага мясакамбіната. У лістападзе 1956 г. прадпрыемства вытворчай магутнасцю 20 тон мяса і 2 тоны каўбасных вырабаў за змену было ўведзена ў эксплуатацыю. У той перыяд на мясакамбінаце працавала 160 чалавек.

У 1970–1980-я гг. прадукцыя прадпрыемства карысталася попытам спажыўцоў. У 1990-я гг. мясакамбінат перажываў цяжкія гады: новыя эканамічныя законы патрабавалі новага падыходу да працы па ўсіх кірунках, аднак састарэлае тэхнічнае абсталяванне і невялікі асартымент прадукцыі не дазвалялі прадпрыемству атрымліваць прыбытак.

У новым стагоддзі наступіў час пошуку новых рынкаў збыту і стварэння новага асартыменту прадукцыі. Вынікі работы калектыву мясакамбіната пацверджаны спецыялістамі рэспубліканскіх і міжнародных выставак і форумаў. У 2015 г. на прадпрыемстве была завершана рэалізацыя буйнога інвестыцыйнага праекта па будаўніцтве мясатлушчавага цэха. У 2018 г. быў адкрыты склад для гандлю ветэрынарнымі прэпаратамі.

Сёння ААТ «Бабруйскі мясакамбінат» з’яўляецца адным з вядучых мясакамбінатаў Беларусі. Каб быць лепшым, прадпрыемства ставіць перад сабой задачы па паляпшэнні якасці прадукцыі, пашырэнні асартыменту і павышэнні кваліфікацыі свайго персаналу.

Матэрыял падрыхтаваны ў 2023 г.