Адным з найбольш прадстаўнічых, яскравых і маштабных свят творчых калектываў Беларусі пасля “Славянскага базару” ў Віцебску па праву лічыцца Міжнародны фестываль харэаграфічнага мастацтва “Сожскі карагод” у Гомелі.

Фестываль быў заснаваны Міністэрствам культуры Рэспублікі Беларусь, Гомельскім абласным і Гомельскім гарадскім выканаўчымі камітэтамі. Мэтай фестывалю стала распаўсюджанне фестывальнага руху на Беларусі, развіццё жанраў харэаграфічнага мастацтва, удасканаленне прафесійнага майстэрства кіраўнікоў харэаграфічных калектываў, узаемадзеянне нацыянальных культур, развіццё сучасных напрамкаў у харэаграфічным мастацтве, пашырэнне і ўмацаванне творчых сувязяў. Журы фестывалю складаецца з ліку самых відных дзеячаў культуры і мастацтва, прафесіяналаў самага высокага ўзроўню. Было вырашана, што мерапрыемства будзе праводзіцца ў горадзе на Сожы раз у 2 гады. Эмблемай фестывалю стала выява бусла, які ляціць у высокім небе, бо бусел для Беларусі – гэта сімвал дабрабыту, спакою, надзейнасці і прыгажосці.

Першы “Сожскі карагод” адбыўся ў 1997 г. На яго з’ехаліся больш за 3 тыс. удзельнікаў з 15 краін свету. Галоўным рэжысёрам мерапрыемства стаў вядомы беларускі балетмайстар і рэжысёр, заслужаны дзеяч культуры Беларусі А.С. Коваль. Афармленнем усіх пляцовак займалася творчая група на чале з гомельскім мастаком, членам Беларускага саюза мастакоў А.У. Отчыкам. Правядзенне фестывалю было прымеркавана да дзвюх знамянальных дат у жыцці горада – 855-годдзю Гомеля і 200-годдзю заснавання архітэктурнай жамчужыны Гомельшчыны – Гомельскага палацава-паркавага ансамбля. Дарэчы, вялікі эпізод першага фестывалю быў прысвечаны балетмайстру, дзеячу самадзейнага мастацтва, народнаму артысту Беларусі А.А. Рыбальчанку, які ў свой час жыў і працаваў у горадзе.

Падчас фестывалю праводзіліся сольныя і сумесныя конкурсныя выступленні дзіцячых і дарослых харэаграфічных калектываў, конкурс балетмайстарскіх работ, паказальныя шоў-праграмы з удзелам мадэльераў, мастакоў і салістаў эстрады, касцюміраваныя марш-парады удзельнікаў па вуліцах горада, а таксама спектаклі балетных тэатраў, выступленні прафесійных танцавальных калектываў, фальклорныя тэатралізаваныя выступленні. Традыцыйным стала правядзенне ў рамках фестывалю аднаго з найбольш яркіх відовішч – Міжнароднага турніру па спартыўных бальных танцах “Золотая Рысь”.

У далейшым кожны “Сожскі карагод” вызначаўся нейкай адметнасцю. Так, у 1999 г. фестываль здзівіў гледачоў воднай феерыяй, у 2002 г. – конкурсам пантамімы “Мім-2002”, у 2011 г. – вогненнымі жанглёрамі, касмічнымі прышэльцамі, скамарохамі і містычнымі персанажамі. Нацыянальны каларыт і непаўторнасць, яскравасць і душэўная цеплыня, яркі тэмперамент артыстаў і прафесіяналізм арганізатараў кожны раз ператвараюць фестываль у форум яднання народаў, свята маладосці, грацыі, хараства, майстэрства і натхнення. Актыўны ўдзел у фестывалі прымаюць творчыя калектывы з Беларусі, Расіі, Украіны, Малдовы, Літвы, Латвіі, Эстоніі, Балгарыі, Францыі, Польшчы, Сербіі, Італіі, Грузіі і інш. На фестываль таксама заўсёды прыязджае шмат гасцей, у тым ліку з гарадоў-пабрацімаў Гомеля: Радом (Польшча), Хуань (Кітай), Абердзін (Шатландыя), Бургас (Балгарыя), Клермон-Ферран (Францыя), Ліепая (Латвія), Масква, Бранск, Курск, Протвіна, Сургут, Ніжні Ноўгарад (Расія), Чарнігаў, Данецк, Сакі, Шчорс (Украіна). На “Сожскім карагодзе” сустракаюцца розныя краіны і народы, напрамкі харэаграфіі і віды мастацтва. Выходзячы на вуліцы, фестываль уліваецца ў Свята горада, насычанае тэатральнымі дзеямі, выставамі, іншымі творчымі праектамі, вулічным гандлем і становіцца сапраўды народным.

Матэрыял падрыхтаваны Гомельскай абласной бібліятэкай імя У.І. Леніна ў 2012 г.