Сяргей Андрэевіч Дзядзінчук нарадзіўся на Украіне (с. Муравін Зарэчненскага раёна Ровенскай вобласці). У 1946–1953 гг. вучыўся ў Мутвіцкай сямігодцы, пасля заканчэння школы паступіў на электрамеханічнае аддзяленне Крамянецкага лесатэхнічнага тэхнікума (цяпер Крамянецкі лесатэхнічны каледж). У тэхнікуме юнак пачаў займацца класічнай барацьбой, стаў чэмпіёнам г. Крамянец (Украіна), чэмпіёнам Цярнопальскай вобласці (Украіна). Пасля тэхнікума быў накіраваны на работу ў трэст «Омсклес» (Расія), дзе спачатку працаваў электрамеханікам. У 1960 г. без адрыву ад воінскай службы выдатна скончыў дывізіённую партыйную школу і быў прыняты ў рады КПСС, а ў 1961 г. яму прысвоілі званне малодшага лейтэнанта-палітработніка. У верасні 1961 г. С.А. Дзядзінчук паступіў у Беларускі дзяржаўны інстытут фізічнай культуры (цяпер Беларускі дзяржаўны ўніверсітэт фізічнай культуры), дзе праявіў сябе як актыўны студэнт, неаднаразова выбіраўся старшынёй студэнцкага савета. У якасці камісара студэнцкага спартыўнага будаўнічага атрада працаваў на будоўлях, быў механізатарам, трактарыстам у Казахстане. За асваенне цалінных зямель С.А. Дзядзінчук быў узнагароджаны медалём (1964). У 1965 г. выдатна скончыў інстытут і быў накіраваны ў Гомель. Атрымаў званне майстра спорта па класічнай барацьбе. З 1965 па 1988 г. С.А. Дзядзінчук ўзначальваў Гомельскую абласную арганізацыю «Дынама», якая дзякуючы яго намаганням стала адной з вядучых у вобласці і краіне. Шмат намаганняў прыклаў для актывізацыі будаўніцтва спартыўных збудаванняў. У 1973–1975 гг. быў уведзены ў эксплуатацыю лёгкаатлетычны манеж і спарткомплекс, адміністрацыйны будынак з 7 заламі, велабазай і іншымі гаспадарчымі збудаваннямі. Была пабудавана плывучая і дзве стацыянарныя вяслярныя базы, залы для заняткаў барацьбой у Мазыры і Рэчыцы, два летнія спартыўна-аздараўленчыя лагеры для весляроў і лёгкаатлетаў.
З 1969 па 1979 г. С.А. Дзядзінчук з’яўляўся членам прэзідыума Беларускага савета «Дынама», доўгі час быў старшынёй абласной федэрацыі, намеснікам старшыні федэрацыі Беларусі па сучасным пацібор'і, неаднаразова прызначаўся кіраўніком беларускай дэлегацыі пяціборцаў.
Вялікі ўклад, унесены С.А. Дзядзінчуком у развіццё беларускага спорту, быў адзначаны медалямі «За доблесную працу», «За бездакорную службу» ІІ і ІІІ ступені, Граматай Вярхоўнага савета БССР, граматамі МУС СССР і Беларусі, спарткамітэта СССР і Беларусі. Падпалкоўнік МУС С.А. Дзядзінчук мае званне выдатніка фізічнай культуры і спорту БССР, заслужанага трэнера і ганаровага дынамаўца СССР.
З 1998 па 2009 г. С.А. Дзядзінчук працаваў у ГА “Беларускае таварыства інвалідаў”: кіраваў адной з раённых арганізацый, уваходзіў у склад рэспубліканскага праўлення, з'яўляўся старшынёй абласной прававой камісіі ГА «БелТІ». Сёння С.А. Дзядзінчук – член прэзідыума савета ветэранаў спорту Гомельскай вобласці.
Матэрыял падрыхтаваны паводле інфармацыі, прадастаўленай Гомельскім аддзяленнем ГА “ВФКіС” у 2012 г.
