Кіпрыян Клімуц нарадзіўся ў в. Альхова Гродзенскага павета (цяпер Ваўкавыскі раён, Гродзенская вобласць) у сялянскай сям’і. Бацькі выхоўвалі яго ў духу хрысціянскай маралі і жадалі бычыць сына ў якасці святара. Адукацыю атрымаў у Варшаўскай духоўнай семінарыі, з пачаткам І Сусветнай вайны працягнуў навучанне ў духоўнай семінарыі ў Саратаве. У далейшым прайшоў курс паскоранага навучання ў Маскоўскай Аляксандраўскай пяхотнай вучэльні, служыў у Чырвонай Арміі. Пасля вяртання на радзіму ў 1921 г. быў пасвячоны ў святара, служыў у розных прыходах Гродзенскай епархіі. З 1930 г. выконваў абавязкі настаяцеля храма Нараджэння Найсвяцейшай Багародзіцы ў в. Ятра (цяпер Навагрудскі раён Гродзенскай вобласці). У 1934 г. святар арганізаваў у сваім прыходзе Праваслаўнае народнае брацтва, якое займалася выхаваннем моладзі і распаўсюджваннем праваслаўных традыцый.

Пасля далучэння тэрыторыі Заходняй Беларусі да БССР па ілжывым абвінавачванні ў антысавецкай агітацыі К. Клімуц у верасні 1939 г. быў арыштаваны органамі Народнага камісарыяту ўнутраных спраў БССР, прыгавораны да 8 гадоў зняволення і высланы ў Каргапольскі папраўча-працоўны лагер у Архангельскай вобласці. Памёр святар у зняволенні ў 1942 г.

У 1989 г. пракуратурай Гродзенскай вобласці Беларускай ССР К. Клімуц быў рэабілітаваны. Кананізацыя свяшчэннамучаніка Кіпрыяна Ятранскага адбылася ў 2011 г.

Матэрыял падрыхтаваны ў 2017 г.