Музей адкрыты 4 лютага 1989 г. у Брэсце як пастаянная выстаўка Брэсцкага абласнога краязнаўчага музея, з 1 студзеня 1998 г. з’яўляецца яго філіялам. Ён адзіны ў Беларусі музей, экспазіцыя якога складаецца з твораў мастацтва і прадметаў антыкварыяту, канфіскаваных брэсцкімі мытнікамі пры спробе іх незаконнага вывазу за мяжу. Калекцыя старажытных ікон, карцін, прадметаў побыту можа ўпрыгожыць лепшыя музеі свету. Пачатак яе фарміраванню пакладзены ў 1953 г., калі Брэсцкі абласны краязнаўчы музей атрымаў ад мытні 30 абразоў і вырабаў меднага мастацкага ліцця. Асноўны фонд налічвае каля 4 тыс. адзінак захоўвання. Экспазіцыя размешчана ў 10 залах. Першая зала прысвечана дзейнасці беларускай дзяржавы, мытнай і пагранічнай службаў па папярэджанні незаконнага вывазу культурных каштоўнасцей за мяжу. Экспануюцца фотаздымкі, зробленыя пры выяўленні кантрабанды, прадметы, выкарыстаныя ў якасці сховаў для яе, абраз “Уласій Севасційскі з жыціем”, распілаваны на шэсць частак, каб схаваць яго ад мытнікаў. У наступных дзвюх залах прадстаўлена самая вялікая і каштоўная частка збору музея – рускі іканапіс XVI – пачатку XX ст. У асобнай зале – абразы ў сярэбраных акладах XVIII – пачатку XX ст., створаныя ў вядучых ювелірных цэнтрах Расіі: Маскве, Санкт-Пецярбургу, Яраслаўлі, Казані, Калузе і інш. Экспазіцыю культавага мастацтва дапаўняюць калекцыі меднага мастацкага ліцця XIX – пачатку XX ст. і растоўскай фініфці. Ювелірнае мастацтва прадстаўлена вырабамі сусветна вядомай фірмы Фабержэ, сярэбранымі каўказскімі паясамі і кінжаламі ў сярэбраных аправах. У зале мастацтва Усходу дэманструюцца традыцыйны японскі жывапіс на шоўку, кітайскія вазы, дэкарыраваныя перагародачнай эмаллю, японскі фаянс з майстэрняў Сацума, будыйская скульптура канца XIX – пачатку XX ст. Еўрапейскае дэкаратыўна-прыкладное мастацтва XVIII – пачатку XX ст. прадстаўлена антыкварнай мэбляй, бронзавымі кандэлябрамі і камінным гадзіннікам XIX ст. Музей валодае разнастайнай калекцыяй фарфору вытворчасці вядомых еўрапейскіх заводаў – Венскага, Капо ды Монтэ, Патшапэль у Саксоніі, імператарскага фарфоравага ў Санкт-Пецярбургу, завода таварыства М. С. Кузняцова ў Вярбілках. Большасць твораў рускага і заходнееўрапейскага жывапісу размешчана ў асобных залах (адпаведна жанравай прыналежнасці). Гэта карціны І. Айвазоўскага, Р. Мясаедава, С. Вінаградава, А. Гараўскага і інш. У раздзеле графікі вылучаюцца творы вядомых мастакоў Ф. Броннікава, М. Урубеля, Ф. Лежэ і інш. Найбольш каштоўныя творы музея дэманструюцца на часовых тэматычных выстаўках, для якіх прызначана асобная зала. У ёй таксама арганізуюцца персанальныя выстаўкі мастакоў Брэстчыны, экспануюцца работы навучэнцаў мастацкіх школ і студый Брэста, творы беларускага і замежнага мастацтва.

Матэрыял падрыхтаваны ў 2015 г.