Піліп Сямёнавіч Горбач нарадзіўся ў вёсцы Будка Рэчыцкага раёна Гомельскай вобласці ў сям’і сялян. Да пачатку Вялікай Айчыннай вайны атрымаў пачатковую адукацыю ў мясцовай школе. Падлеткам перажыў нямецкую акупацыю. Пасля вызвалення вёскі працаваў ездавым у калгасе «Дабраволец».

Скончыў курсы машыністаў экскаватара і з 1948 г. стаў працаваць памочнікам машыніста. Удзельнічаў у пракладцы першых меліярацыйных каналаў у сваім раёне. У тым жа годзе быў прызваны на тэрміновую службу ў рады Савецкай Арміі, якую праходзіў у будаўнічай частцы. У складзе механізаванага батальёна ўдзельнічаў у пракладцы Волга-Данскога суднаходнага канала. Паказаў сябе выдатнікам баявой і палітычнай падрыхтоўкі, атрымаў 12 Ганаровых грамат ад камандавання.

Пасля звальнення ў запас вярнуўся ў Беларусь і працаваў па набытай спецыяльнасці ў структуры Міністэрства меліярацыі БССР, удзельнічаў у пабудове асушальных сістэм на балотных масівах Гомельскай вобласці. У 1961 г. уладкаваўся на працу ў Капаткевіцкае будаўніча-мантажнае ўпраўленне меліярацыі (з 1966 г. у складзе трэста “Калінкавічыводбуд”) старшым машыністам экскаватара.

Экіпаж экскаватара на чале з П.С. Горбачам нязменна паказваў высокі ўзровень працы, узорна рыхтаваў тэхніку да кожнага працоўнага сезона і з штогод дабіваўся ўсё больш высокіх вытворчых паказчыкаў. За кошт прымянення перадавых метадаў механізацыі ручных работ, паляпшэння арганізацыі працы, эксплуатацыі тэхнікі і скарачэння яе прастою меліяратары датэрмінова здавалі аб’екты, выконвалі і перавыконвалі ўзятыя абавязацельствы.

Указам Прэзідыума Вярхоўнага Савета СССР ад 23 чэрвеня 1966 г. за поспехі, дасягнутыя ў павелічэнні вытворчасці і нарыхтовак жыта, пшаніцы, грэчкі і іншых збожжавых і кармавых культур, Піліпу Сямёнавічу Горбачу было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Піліп Сямёнавіч працаваў у структуры трэста «Калінкавічыводбуд» да выхаду на заслужаны адпачынак. Шмат часу ён аддаваў выхаванню маладых спецыялістаў, перадаваў ім сваё майстэрства і вопыт. Прымаў удзел у грамадскім жыцці: выбіраўся дэпутатам Вярхоўнага Савета Беларускай ССР. Узнагароджаны ордэнам Леніна, медалямі, меў ганаровае званне «Заслужаны меліяратар Беларускай ССР».

Пераклад 2021 г. матэрыялаў інтэрнэт-праекта «Герои страны».