Усовіч Павел Генадзьевіч, беларускі артыст-вакаліст, нарадзіўся ў Бабруйску. У 1990 г. скончыў музычную школу і паступіў на аддзяленне харавога дырыжыравання Магілёўскага вучылішча культуры. У 1995 г. прымаў удзел у першым Міжнародным фестывалі “Залаты шлягер”, у 1997 г. стаў лаўрэатам. З'яўляецца таксама лаўрэатам і дыпламантам рэспубліканскіх фестываляў і конкурсаў “Студэнцкая вясна-94”, “Песню бярыце з сабой”, “Маладзечна-95”. З 1998 г. П. Усовіч выступае ў цыркавым калектыве пад кіраўніцтвам А. Ермакова. З 2004 г. з'яўляецца салістам аркестра народных інструментаў імя Л.Л. Іванова. У 2008 г. ён скончыў рэжысёрскі факультэт Беларускага дзяржаўнага ўніверсітэта культуры і мастацтваў. На працягу шэрагу гадоў з’яўляецца вядучым дзіцячай шоу-праграмы “Чароўны малыш”, штогод рыхтуе новыя канцэртныя выступленні. Сярод іх – “Як добра, што ёсць любоў...” (2009, прысвечалася 15-годдзю творчай дзейнасці), “Жыццё маё, лёс мой” (2010) і інш. Зараз П. Усовіч – вядучы вакаліст Магілёўскай абласной філармоніі. У рэпертуары артыста песні, рамансы, балады айчынных і замежных кампазітараў, каля 50 песень на ўласныя тэксты. Ён цесна супрацоўнічае з беларускім кампазітарам А. Жукавым і магілёўскімі аўтарамі Р. Макаранкам, М. Карніенкам, У. Каньяковым, А. Сташкевічам. У сумесных выступленнях часта выступае не толькі як саліст, але і як вядучы.

У 2011 г. за высокае выканальніцкае майстэрства і значны асабісты ўклад у развіццё і прапаганду беларускага мастацтва П. Усовіч адзначаны высокай дзяржаўнай узнагародай – медалём Францыска Скарыны.

Матэрыял падрыхтаваны Магілёўскай абласной бібліятэкай імя У. І. Леніна ў 2018 г.