Уладзіслаў Ганчароў нарадзіўся ў горадзе Віцебску. У 6 гадоў хлопчык пачаў займацца гімнастыкай, аднак ужо пасля трох месяцаў заняткаў яго адлічылі, таму што палічылі, што ў яго няма здольнасцяў і задаткаў да заняткаў спортам. Трэнер СДЮШАР №2 па батуце Вольга Уласава была не згодна з гэтым меркаваннем. Яна ўбачыла ў асобе хлапчука не толькі неабходныя дадзеныя для заняткаў скачкамі на батуце, але і вялікае жаданне трэніравацца. Яна не толькі стала першым трэнерам Уладзіслава Ганчарова, але, як часта адзначае гэта сам Ганчароў у інтэрв’ю, і дапамагла заваяваць спартсмену залаты алімпійскі медаль.

Праз 6 гадоў з пачатку заняткаў скачкамі на батуце Уладзіслаў Ганчароў заваяваў першую ўзнагароду. На чэмпіянаце свету ў 2013 годзе ў індывідуальных спаборніцтвах спартсмен заняў 8 месца, у сінхронных скачках – 6. Першае “золата” з’явілася ў калекцыі спартсмена ў 2014 годзе пасля чэмпіяната Еўропы ў Гімарайншы, дзе Уладзіслаў Ганчароў паказаў лепшы вынік у індывідуальных спаборніцтвах, а таксама заваяваў “бронзу” у камандных спаборніцтвах. У гэтым жа годзе на чэмпіянаце свету ў Дэйтана-Біч Ганчароў стаў срэбраным прызёрам у сінхронных скачках і бронзавым – у індывідуальных спаборніцтвах.

На I Еўрапейскіх гульнях беларускі спартсмен толькі крыху саступіў расіяніну Дзмітрыю Ушакову ў індывідуальных і сінхронных скачках і заваяваў сярэбраны медаль. У гэтым жа годзе на чэмпіянаце свету ў Адэнсе Ганчароў стаў сярэбраным прызёрам у індывідуальных і сінхронных скачках і бронзавым – у камандных спаборніцтвах.

У перадалімпійскім сезоне Уладзіслаў Ганчароў заваяваў залаты медаль на чэмпіянаце Еўропы 2016 года ў Вальядолідзе. Аднак галоўным стартам для спартсмена і яго трэнера ў 2016 годзе былі, безумоўна, Алімпійскія гульні. Па словах самога Ганчарова, заваяваць залаты медаль ён не разлічваў, спадзеючыся на сярэбраную або бронзавую ўзнагароду. Але трэнер Вольга Уласава была абсалютна ўпэўнена ў сваім падапечным, які ідэальна выканаў усе элементы сваёй праграмы і на першай у сваёй кар’еры Алімпіядзе падняўся на вышэйшую ступень п’едэстала. Залаты медаль Уладзіслава Ганчарова стаў першай у гісторыі Беларусі алімпійскай узнагародай па скачкам на батуце.

Пасля заканчэння Алімпійскіх гульняў працягваў трэніравацца і рыхтавацца да новых стартаў. У ліпені 2018 года на этапе Кубка свету ў швейцарскай Арозе спарсмен заняў першае месца.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.