Уладзімір Аляксандравіч Баўм нарадзіўся ў вёсцы Карыцішкі Бельскага павета Беластоцкага ваяводства (цяпер в. Карыціскі Падляскага ваяводства Польшчы). Скончыў Беластоцкую тэхнічную гімназію. У час Вялікай Айчыннай вайны быў вывезены на прымусовыя работы ва Усходнюю Прусію. У лютым 1945 г. уступіў у Чырвоную Армію, прымаў удзел у штурме Кёнігсберга, баях супраць японскіх мілітарыстаў на Забайкальскім фронце, быў узнагароджаны ордэнам Чырвонай Зоркі.

У 1950–1954 гг. працаваў на Гродзенскім камбінаце будаўнічых матэрыялаў. У 1954 г. быў накіраваны ў вёску Жылі Іўеўскага раёна Гродзенскай вобласці, дзе ўзначаліў мясцовы калгас «Стаханавец». Каб ўдала кіраваць гаспадаркай У.А. Баўм скончыў Гродзенскі дзяржаўны аграрны ўніверсітэт. У 1961 г. узначаліў калгас імя XXII з'езда КПСС (цяпер Камунальнае сельскагаспадарчае ўнітарнае прадпрыемства «Баўма») таго ж раёна. Укараняў сучасныя тэхналогіі ў жывёлагадоўлі і земляробстве, шмат увагі надаваў сацыяльна-культурнаму будаўніцтву. Прыбытак гаспадаркі ў 1970-я гг. штогод складаў каля 675 тыс. рублёў. На сродкі калгаса ў Геранёнах быў пабудаваны Палац культуры, школа і дзіцячы садок, гандлёвы цэнтр, паліклініка, парк атракцыёнаў. У калгасе меўся ўласны авіяатрад, дзейнічала студыя каляровага тэлебачання.

Указам Прэзідыума Вярхоўнага Савета СССР ад 22 сакавіка 1966 г. за дасягнутыя поспехі у развіцці жывёлагадоўлі, павелічэнні вытворчасці і нарыхтовак мяса, малака, яек, воўны і іншай прадукцыі Уладзіміру Аляксандравічу Баўму было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Уладзімір Аляксандравіч Баўм працягваў кіраваць калгасам да 1990 г. Увесь час яго гаспадарка заставалася адной з лепшых у краіне па ўраджайнасці збожжавых культур, бульбы і кармавых караняплодаў, вытворчасці мяса і малака. Шмат часу У.А. Баўм аддаваў грамадскай рабоце: у 1960-я гг. з'яўляўся дэпутатам Вярхоўнага Савета БССР, быў членам Рэвізійнай камісіі ЦК КПБ, дэлегатам з'ездаў Кампартыі Беларусі. У 1990 г. выйшаў на заслужаны адпачынак. У 1995 г. гаспадарцы, якую раней узначальваў У.А. Баўм, было прысвоена яго імя.

Узнагароджаны ордэнамі Леніна, Кастрычніцкай Рэвалюцыі, Працоўнага Чырвонага Сцяга, Чырвонай Зоркі, «Знак Пашаны», медалямі, Ганаровай граматай Прэзідыума Вярхоўнага Савета Беларускай ССР (1960), Ганаровай граматай Нацыянальнага сходу Рэспублікі Беларусь (2002).

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта “Герои страны”.