Раман Леапольдавіч Ваньковіч нарадзіўся ў вёсцы Дзераўная Стаўбцоўскага раёна Мінскай вобласці. Скончыў Дзераўнянскую сямігадовую школу, вучыўся на аддзяленні фабрычна-завадскога навучання, некаторы час працаваў у Іркуцкай вобласці. У 1956–1958 гг. служыў ва Узброеных Сілах СССР.

Пасля дэмабілізацыі паступіў у Ашмянскае вучылішча па падрыхтоўцы механізатараў сельскай гаспадаркі, якое скончыў у 1960 г. У 1960–1961 гг. працаваў трактарыстам Івянецкай МТС Валожынскага раёна, у 1961–1962 гг. быў слесарам Івянецкага раённага аб’яднання “Белсельгастэхніка”. У 1962 г. Р. Ваньковіч стаў трактарыстам калгаса “Чырвоная зорка” (з 2003 г. – сельскагаспадарчы вытворчы кааператыў “Дзераўное”) Стаўбцоўскага раёна. Праз два гады ўзначаліў механізаванае звяно па вырошчванні бульбы і хутка дамогся высокіх вынікаў працы – больш за 300 цэнтнераў бульбы з гектара. Без адрыву ад вытворчасці Р. Ваньковіч скончыў сельскагаспадарчы тэхнікум і атрымаў спецыяльнасць агранома, узначаліў раённую школу перадавікоў.

Указам Прэзідыума Вярхоўнага Савета СССР 12 снежня 1973 г. за вялікія поспехі, дасягнутыя ва Усесаюзным сацыялістычным спаборніцтве, і праяўленую працоўную доблесць у выкананні прынятых абавязацельстваў па павелічэнні вытворчасці і продажу дзяржаве збожжа, бульбы, цукровых буракоў і іншых прадуктаў земляробства Раману Леапольдавічу Ваньковічу было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

У 1985 г. Р. Ваньковічу быў уручаны імянны трактар, на якім ён працаваў да выхаду на заслужаны адпачынак.

Раман Леапольдавіч Ваньковіч узнагароджаны двума ордэнамі Леніна, ордэнам Кастрычніцкай Рэвалюцыі, медалямі ВДНГ, знакам “Выдатнік сельскагаспадарчай вытворчасці”, мае ганаровае званне “Заслужаны работнік сельскай гаспадаркі БССР”, з’яўляецца ганаровым грамадзянінам Стаўбцоўскага раёна.

Пераклад 2020 г. матэрыялаў інтэрнэт-праекта “Герои страны”.