Домна Іванаўна Варац нарадзілася ў вёсцы Княжаводцы Мастоўскага раёна Гродзенскай вобласці. У дзяцінстве страціла бацькоў і выхоўвалася ў сям’і сваякоў, была парабчанкай у панскіх гаспадарках.

Пасля далучэння Гродзенскай вобласці да БССР у 1939 г. разам з мужам і дзецьмі пераехала ў вёску Рагозніца, дзе быў створаны адзін з першых калгасаў. У перыяд Вялікай Айчыннай вайны пражывала на акупіраванай тэрыторыі. У 1945 г. адной з першых пачала працаваць у адноўленым калгасе: вырасціла каля дваццаці цялят, якія далі пачатак калгаснаму статку. У 1950-я гг. Домна Варац адной з першых засвоіла методыку інтэнсіўнага адкорму цялят, пры гэтым вага некаторых жывёл даходзіла да 350 кг.

Указам Прэзідыума Вярхоўнага Савета СССР ад 22 сакавіка 1966 г. за дасягнутыя поспехі ў развіцці жывёлагадоўлі, павелічэнні вытворчасці і нарыхтовак мяса, малака, яек, воўны і іншай прадукцыі Домне Іванаўне Варац было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Домна Іванаўна Варац працягвала працаваць у калгасе да 1969 г. Узнагароджана ордэнам Леніна (1966), медалямі, у тым ліку “За працоўную доблесць” (1960). У вёсцы Вялікая Рагозніца штогод праходзіць турнір па валейболе памяці Д.І. Варац.

Пераклад 2020 г. матэрыялаў інтэрнэт-праекта “Герои страны”.