Аляксандр Міхайлавіч Тарасевіч нарадзіўся ў Мінску ў сям’і рабочых. З юнацкіх гадоў працаваў друкаром у рэдакцыі рэспубліканскай газеты “Звязда”. Да пачатку Вялікай Айчыннай вайны быў курсантам ваеннага вучылішча ў Ніжнім Ноўгарадзе. У час вайны быў разведчыкам атрада імя Лазо 3-й Мінскай партызанскай брыгады імя Будзёнага, якая дзейнічала на тэрыторыі Пухавіцкага, Рудзенскага, Старадарожскага і Мінскага раёнаў. З лета 1944 г. – на фронце.

Пасля заканчэння вайны і дэмабілізацыі Аляксандр Тарасевіч вярнуўся на радзіму. З 1946 г. працаваў у вёсцы Сеніца Мінскага раёна ў калгасе “Чырвоны спецыяліст” (у 1947 г. перайменаваны ў калгас імя Гастэлы). Спачатку быў цесляром, затым брыгадзірам будаўнічай брыгады. Праявіў сябе як адказны і працавіты работнік. Па меры аднаўлення калгаснай гаспадаркі быў пераведзены на пасаду брыгадзіра паляводчай брыгады.

На працягу пасляваеннага дзесяцігоддзя калгас імя Гастэлы ператварыўся ў буйную шматгаліновую гаспадарку. Вядучай галіной стала малочна-мясная жывёлагадоўля, значныя поспехі былі дасягнуты і ў вырошчванні сельскагаспадарчых культур. Паляводы калгаса нязменна атрымлівалі высокія ўраджаі (збожжавых – не менш за 25 цэнтнераў, бульбы па 140-180 цэнтнераў з кожнага гектара). У сярэдзіне 1950-х гг. у гаспадарцы сталі вырошчваць новую, складаную па агратэхніцы культуру – цукровую кукурузу. Гастэлаўцы здолелі ў кароткі тэрмін авалодаць сакрэтамі вырошчвання гэтай культуры. Брыгада А.М. Тарасевіча збірала найбольшыя ўраджаі – да 500 цэнтнераў сіласу з кожнага гектара.

Указам Прэзідыума Вярхоўнага Савета СССР ад 18 студзеня 1958 г. за выдатныя поспехі, дасягнутыя ў справе развіцця сельскай гаспадаркі па вытворчасці збожжа, бульбы, ільну, мяса, малака і іншых прадуктаў сельскай гаспадаркі і ўкараненне ў вытворчасць дасягненняў навукі і перадавога вопыту Аляксандру Міхайлавічу Тарасевічу было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

У 1960 г. А.М. Тарасевіч узначаліў калгас імя ЦК КПБ у вёсцы Голацк Пухавіцкага раёна Мінскай вобласці. Выбіраўся дэпутатам Голацкага сельскага Савета дэпутатаў працоўных. Узнагароджаны ордэнам Леніна, медалямі, а таксама Ганаровай граматай Прэзідыума Вярхоўнага Савета Беларускай ССР.

Пераклад 2021 г. матэрыялаў інтэрнэт-праекта “Герои страны”.