Таццяна Іванаўна Хмялькова нарадзілася ў вёсцы Грачушына Расонскага раёна Віцебскай вобласці ў сялянскай сям’і.

З малых гадоў Таццяна дапамагала бацькам па гаспадарцы, потым стала працаваць нароўні з дарослымі. Атрымала пачатковую адукацыю ў роднай вёсцы. Некаторы час дзяўчына працавала на пошце ў райцэнтры, затым яе перавялі ў паштовае аддзяленне ў вёсцы Сяляўшчына.

З пачаткам Вялікай Айчыннай вайны Таццяна вярнулася ў родную вёску. У перыяд нямецка-фашысцкай акупацыі працавала ў бацькоўскай гаспадарцы, дапамагала партызанам.

Пасля вызвалення раёна летам 1944 г. удзельнічала ў аднаўленні сельскай гаспадаркі. Па закліку камсамола паехала працаваць на будоўлі народнай гаспадаркі ў Літоўскай ССР і Калінінградскай вобласці РСФСР. Потым вярнулася ў родны край і пасялілася ў вёсцы Бірузова Парыцкага сельсавета.

У 1958 г. Таццяна Іванаўна Хмялькова пачала працаваць на мясцовай свінаферме. Больш за 15 гадоў яна была свінаркай і, нягледзячы на адсутнасць механізацыі, здолела за кароткі тэрмін стаць адной з перадавых працаўнікоў саўгаса. Асабліва паспяховым для Т.І. Хмяльковай стаў 1965 г.

У 1966 г. за дасягнутыя поспехі ў развіцці жывёлагадоўлі, павелічэнні вытворчасці і нарыхтовак мяса Таццяне Іванаўне Хмяльковай было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Таццяна Хмялькова працавала на ферме да выхаду на заслужаны адпачынак у 1976 г. Жыла ў вёсцы Бірузова Расонскага раёна Віцебскай вобласці, затым у горадзе Нарва Эстонскай Рэспублікі. Узнагароджана ордэнам Леніна (1966), медалямі.

Пераклад 2021 г. матэрыялаў інтэрнэт-праекта «Герои страны».