Марыя Якаўлеўна Ткачова нарадзілася ў вёсцы Бронніца Буда-Кашалёўскага раёна Гомельскай вобласці ў сялянскай сям’і. З пачаткам калектывізацыі ўступіла ў мясцовы калгас, працавала ў паляводстве.

У час Вялікай Айчыннай вайны Марыя засталася адна з трыма малалетнімі дзецьмі. Пасля вызвалення раёна прымала ўдзел у аднаўленні калгаснай вытворчасці, працавала даяркай на малочна-таварнай ферме калгаса «Зара» ў вёсцы Ліпінічы. У 1955 г. ёй даверылі догляд кароў бурай латвійскай пароды. Самаадданая праца, дбайнае выкананне правіл утрымання, індывідуальны падыход і любоў да жывёл дазволілі Марыі Якаўлеўне дамагчыся высокіх надояў малака і поўнага захавання прыплоду ў замацаванай за ёй групе.

Па выніках 1956 г. даярка заняла першае месца ў сацыялістычным спаборніцтве ў калгасе і раёне. Гадавое абавязацельства на наступны год яна выканала датэрмінова і была прызнана лепшай даяркай вобласці, атрымаўшы ад кожнай з замацаваных жывёл у сярэднім па 4659 кілаграмаў малака.

Указам Прэзідыума Вярхоўнага Савета СССР ад 18 студзеня 1958 г. за выдатныя поспехі, дасягнутыя ў справе развіцця сельскай гаспадаркі па вытворчасці збожжа, бульбы, ільну, мяса, малака і іншых прадуктаў сельскай гаспадаркі, а таксама ўкараненне ў вытворчасць дасягненняў навукі і перадавога вопыту Марыі Якаўлеўне Ткачовай было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Марыя Якаўлеўна Ткачова ўтрымлівала званне адной з лепшых даярак Гомельскай вобласці да выхаду на заслужаны адпачынак. Неаднаразова ўдзельнічала ва Усесаюзнай сельскагаспадарчай выстаўцы. Узнагароджана ордэнам Леніна, медалямі, у тым ліку медалём ВДНГ СССР.

Пераклад 2021 г. матэрыялаў інтэрнэт-праекта «Герои страны».