Марыя Ягораўна Чуяшова нарадзілася ў вёсцы Стаўбун Веткаўскага раёна Гомельскай вобласці ў сялянскай сям’і. У гады Вялікай Айчыннай вайны перажыла акупацыю, рана засталася без бацькі, які загінуў на фронце. Пасля вызвалення раёна М.Я. Чуяшова некаторы час вучылася ў Стаўбунскай няпоўнай сярэдняй школе, але хутка вымушана была пакінуць вучобу і пайсці працаваць у мясцовы калгас «Зорка».

З утварэннем у 1959 г. саўгаса «Стаўбунскі» Марыя Ягораўна перайшла працаваць на свінагадоўчую ферму. Вывучала перадавы вопыт, імкнулася прымяніць на практыцы ўсё новае і прагрэсіўнае. Добры догляд, захаванне збалансаваных рацыёнаў кармлення жывёл далі выдатныя вынікі. У перыяд сёмай і восьмай пяцігодак Марыя Чуяшова штогод дамагалася высокіх паказчыкаў у працы. За дзявятую пяцігодку замест планавых трох тысяч атрымала ад падкантрольнай групы свінаматак тры тысячы сямсот парсючкоў.

Указам Прэзідыума Вярхоўнага Савета СССР ад 8 красавіка 1971 г. за выдатныя поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Марыі Ягораўне Чуяшовай было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Марыя Чуяшова і надалей ударна працавала ў гаспадарцы. З 1979 г. да выхаду на заслужаны адпачынак працавала рабочай збожжасховішча саўгаса «Паўночны». Выбіралася дэпутатам Вярхоўнага Савета Беларускай ССР, Веткаўскага раённага і Стаўбунскага сельскага Саветаў дэпутатаў працоўных. Узнагароджана ордэнам Леніна, медалямі.

Пераклад 2021 г. матэрыялаў інтэрнэт-праекта «Герои страны».