Яніна Васільеўна Салаўёва нарадзілася ў Чэрвеньскім раёне Мінскай вобласці. У гады Вялікай Айчыннай вайны страціла бацькоў і летам 1944 г. трапіла ў Чэрвеньскі дзіцячы дом. Праз некаторы час дзяўчынку ўзялі да сябе сёстры Вікторыя і Марыя Анцілеўскія, назвалі Янінай, выбралі днём нараджэння 1 Мая, а месцам нараджэння – вёску Іўнік, дзе самі жылі.

Яніна з малых гадоў дапамагала прыёмнай маці па гаспадарцы, збірала лекавую сыравіну для сельпо і ягады на продаж. Пасля атрымання сярэдняй адукацыі прыехала ў Мінск, працавала на будаўніцтве Мінскага аэрапорта, была рабочай на Мінскім маргарынавым заводзе, круцільшчыцай на Мінскім камвольным камбінаце (цяпер ААТ “КамВоль”). У 1964 г. уладкавалася на працу на Мінскі прыборабудаўнічы завод імя Ф.Э. Дзяржынскага (цяпер ААТ “Інтэграл” – кіруючая кампанія холдынга “Інтэграл”). Спачатку была зборшчыцай, а пасля заканчэння тэхнічнага вучылішча № 76 электратэхнікі (цяпер Мінскі дзяржаўны каледж электронікі) стала працаваць наладчыцай паўправадніковых прыбораў.

Яніна Салаўёва зарэкамендавала сябе як дысцыплінаваны, добрасумленны і адказны работнік. Доўгія гады заставалася ў ліку ўдарнікаў вытворчасці, нязменна выходзіла пераможцам сацыялістычнага спаборніцтва пры выкананні заданняў пяцігадовых планаў развіцця народнай гаспадаркі. Дасканалае валоданне прафесіяй дапамагло ёй першай у цэху дамагчыся рэкордных паказчыкаў у выпуску прадукцыі пры захаванні яе высокай якасці, быць ударнікам 8-й і 9-й пяцігодак.

Указам Прэзідыума Вярхоўнага Савета СССР ад 12 жніўня 1975 г. за выдатныя вытворчыя поспехі ў датэрміновым выкананні заданняў і сацыялістычных абавязацельстваў дзявятай пяцігодкі Яніне Васільеўне Салаўёвай прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Гэтак жа ўдарна яна працягвала працаваць да выхаду на заслужаны адпачынак у 1995 г. У 1980 г. стала ганаровым работнікам электроннай прамысловасці. Была актыўным настаўнікам рабочай моладзі, прывівала вучням любоў да прафесіі, ахвотна дзялілася з імі ўласным майстэрствам.

Яніна Васільеўна Салаўёва прымала актыўны ўдзел у грамадскім жыцці Мінска і рэспублікі. За перыяд працоўнай дзейнасці выбіралася народным засядацелем Кастрычніцкага раённага суда, дэпутатам Кастрычніцкага раённага і Мінскага гарадскога Саветаў дэпутатаў працоўных, членам прэзідыума абласнога савета прафсаюзаў і Прэзідыума Беларускага рэспубліканскага савета прафсаюзаў. Узнагароджана ордэнамі Леніна (1975), “Знак Пашаны” (1971), медалямі.

Пераклад 2021 г. матэрыялаў інтэрнэт-праекта “Герои страны”.