Ядвіга Іванаўна Рэкуць нарадзілася ў сяле Студзенікі Свіслацкага раёна Гродзенскай вобласці ў шматдзетнай сялянскай сям’і. Скончыла 7 класаў школы.

Свой працоўны шлях пачала ў 1950 г. Займалася вырошчваннем табакі. З 1954 г. была ў брыгадзе па вырошчванні лёну. З 1957 г. працавала свінаркай саўгаса «Новы двор» (цяпер унітарнае прадпрыемства «Новы Двор-Агра») Свіслацкага раёна. Ядвіга Іванаўна добра авалодала ведамі па ветэрынарыі, таму забяспечвала адкорм да 1000 парасят у год. Пастаянна перадавала свой вопыт калегам, арганізавала на ферме школу жывёлаводаў. Ёй першай даверылі догляд групы племянных свінаматак буйной белай пароды, завезеных з Эстоніі. У 1965 г. перадавая свінарка атрымала па 22 парасяці ад кожнай свінаматкі.

Указам Прэзідыума Вярхоўнага Савета СССР ад 22 сакавіка 1966 г. за дасягнутыя поспехі ў развіцці жывёлагадоўлі, павелічэнні вытворчасці і нарыхтовак мяса, малака, яек, воўны і іншай прадукцыі Ядвізе Іванаўне Рэкуць прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

У 1968 г. Я.І. Рэкуць атрымала званне майстра жывёлагадоўлі І класа. Працягвала працаваць свінаркай да выхаду на заслужаны адпачынак у 2001 г. Прымала ўдзел у грамадскім і палітычным жыцці краіны, выбіралася дэпутатам Вярхоўнага Савета БССР. Узнагароджана ордэнам Леніна, медалямі ВДНГ СССР.

Пераклад 2021 г. матэрыялаў інтэрнэт-праекта «Герои страны».