Валодзька Адольф (Алег) Адольфавіч нарадзіўся ў вёсцы Старчуны Пастаўскага раёна Віцебскай вобласці. Працоўную дзейнасць пачаў у 1960 г. трактарыстам у калгасе імя Дзяржынскага. Завочна скончыў Гарадоцкі тэхнікум механізацыі сельскай гаспадаркі. У 1968 г. быў абраны старшынёй калгаса імя Суворава Пастаўскага раёна.

Малады старшыня здолеў зрабіць з адсталага калгаса перспектыўную квітнеючую гаспадарку, якая спецыялізавалася на племянной жывёлагадоўлі, мела пяць тысяч галоў буйной рагатай жывёлы, тры з паловай тысячы галоў свіней, невялікую конеферму. Дойны статак гаспадаркі налічваў 1000 кароў, якія размяшчаліся на чатырох фермах і працавалі па паточна-цэхавай сістэме вытворчасці малака. У сярэднім па калгасу надойвалі больш 3000 кілаграмаў малака на карову ў год. Значных поспехаў дасягнула гаспадарка і ў вырошчванні збожжа і бульбы. У калгасе працавалі вытворчыя цэхі, якія займаліся пластмасавым і алюмініевым ліццём, пашывам скураных вырабаў, кансерваваннем, вытворчасцю сыроў.

Вялікая ўвага надавалася сацыяльнай сферы: усе населеныя пункты калгаса былі добраўпарадкаваны, былі пабудаваны катэджы для калгаснікаў, паліклініка, Палац культуры, гасцініца, агратуркомплекс, аэраклуб і іншыя аб’екты.

Указам Прэзідыума Вярхоўнага Савета СССР ад 17 жніўня 1988 г. за выдатныя вынікі, дасягнутыя ў павелічэнні вытворчасці сельскагаспадарчай прадукцыі на аснове асваення інтэнсіўных тэхналогій і перадавых метадаў арганізацыі працы ў земляробстве і жывёлагадоўлі, і праяўленую працоўную доблесць Адольфу Адольфавічу Валодзьку было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Больш за 40 гадоў кіраваў калгасам імя Суворава (з 2003 г. сельскагаспадарчы вытворчы кааператыў «Навасёлкі-Лучай») А.А. Валодзька. Выбіраўся дэпутатам раённага і абласнога Саветаў дэпутатаў працоўных, быў народным дэпутатам СССР.

Узнагароджаны двума ордэнамі Леніна, ордэнам Кастрычніцкай Рэвалюцыі, Працоўнага Чырвонага Сцяга, Дружбы народаў, медалямі. З’яўляўся заслужаным работнікам сельскай гаспадаркі Беларускай ССР.

Знаходзячыся на заслужаным адпачынку, Адольф Адольфавіч напісаў чатыры кнігі прозы, прысвечаныя жыццю і дзейнасці выдатных людзей Беларусі, з якімі яго звёў лёс. У памяць аб А.А. Валодзьку на будынку адміністрацыі ААТ «Навасёлкі-Лучай» устаноўлена мемарыяльная дошка.

Пераклад 2021 г. матэрыялаў інтэрнэт-праекта «Герои страны».