Будаўніцтва прадпрыемства было распачата ў 1987 г. пры долевым удзеле калгасаў Мінскай вобласці і было названа «Любанскае міжгаспадарчае прадпрыемства па вытворчасці дробных сценавых блокаў».

Інстытутам НДПІ сілікатабетон (г. Талін) для прадпрыемства была распрацавана тэхналагічная лінія па вытворчасці дробных ячэістабетонных блокаў з выкарыстаннем аўтаклаваў дыяметрам 2 метры, якая атрымала назву «Бабруйск – 1,2». Магутнасць дзвюх тэхналагічных ліній склала 140 тыс. куб. метраў у год.

29 красавіка 2003 г. Любанскае міжгаспадарчае прадпрыемства па вытворчасці дробных сценавых блокаў было пераўтворана ў адкрытае акцыянернае таварыства «Любанскі завод сценавых блокаў».

У 2005 г. на заводзе праведзена мадэрнізацыя другой тэхналагічнай лініі, закуплена новае абсталяванне вытворчасці ЗАТ «Цяжмехпрэс» (г. Варонеж, Расія). Варонежская лінія з’яўляецца аналагам абсталявання нямецкай фірмы «Ітонг». Блокі, якія выпускаюцца на гэтай лініі, нічым не саступаюць па якасці блокам, выпушчаным на лініях вядучых замежных кампаній.

ААТ «Любанскі завод сценавых блокаў» спецыялізуецца на выпуску ячэістабетонных вырабаў і займае пятае месца па аб’ёму вытворчасці вырабаў з ячэістага бетону сярод прадпрыемстваў Рэспублікі Беларусь. Прадпрыемства выпускае блокі сценавыя з ячэістых бетонаў; пліты пенапалістырольныя цеплаізаляцыйныя; блокі бетонныя для сцен падвалаў будынкаў і збудаванняў; сумесі бетонныя гатовыя да ўжывання з цяжкага бетону (таварны бетон); канструкцыі бетонныя і жалезабетонныя для калодзежаў.

Дзякуючы сваёй высокай якасці прадукцыя прадпрыемства карыстаецца ўстойлівым попытам на будаўнічых рынках Рэспублікі Беларусь, Расійскай Федэрацыі, краін Балтыі.

З 2008 г. на прадпрыемстве дзейнічае сістэма менеджменту якасці ў адпаведнасці з патрабаваннямі СТБ ISO 9001-2009, выпрацавана гнуткая сістэма зніжак і індывідуальны падыход да кожнага кліента.

Матэрыял падрыхтаваны ў 2023 г.