З сям’і служачых. Нарадзіўся ў с. і чыг. ст. Жодзіна, Барысаўскі пав., Мінская губ., цяпер горад Мінскай вобл.

Пасля заканчэння 7-мігадовай школы (1925) працаваў у канторы “Вадаканалбуд”, г. Мінск. 1927–1929 гг. – вучоба на 2-хгадовых педагагічных курсах, г. Мінск. 1929–1930 гг. – настаўнік у пачатковай школе, Бягомльскі р-н, Мінская акруга. 1930–1931 гг. – адказны сакратар рэдакцыі Бягомльскай раённай газеты. 1931–1936 гг. – вучоба ў Дзяржаўным вышэйшым інстытуце на літаратурна-лінгвістычным факультэце, г. Мінск. 1936–1938 гг. – праца ў Педагагічным вучылішчы загадчыкам вучэбнай часткай і выкладчыкам беларускай і рускай моў і літаратуры, г. Мазыр, Мазырская / Палеская акруга.

У канцы 1938 – 1939 гг. – служба ў РСЧА. 17.09–25.09.1939 г. – прымаў удзел у паходзе РСЧА ў Заходнюю Беларусь. 1939–1940 гг. – загадчык кабінета літаратуры і метадыст па мове ў Інстытуце ўдасканалення настаўнікаў, г. Мінск. У чэрвені 1941 г. прызваны ў РСЧА Кагановіцкім РВК.

1942 г. – па загадзе партызанскай брыгады імя І. Сталіна працаваў па зборы звестак пра дыслакацыі войск праціўніка. У 1943–1944 гг. – на франтах Вялікай Айчыннай вайны. Чырвонармеец 199-га армейскага запаснога стралковага палка, быў двойчы паранены, праходзіў лячэнне ў СЭГ № 290 (па 16.07.1944), ў ЭГ № 5021 (па 27.09.1944). 1945 г. – дэмабілізаваны па раненні, інвалід вайны. 01.04.1947 г. прыняты на працу ў Дзяржбібліятэку БССР бібліятэкарам. 15.04.1947 г. – пераведзены на пасаду бібліёграфа. 18.01.1948–18.01.1956 гг. – загадчык Кніжнай палаты пры Дзяржбібліятэцы БССР.

Узнагароды: медалі “За баявыя заслугі” (1944), “За перамогу над Германіяй у Вялікай Айчыннай вайне 1941–1945 гг.”.

Пахаваны ў Мінску.