Вячаслаў Аляксандравіч Нікіфараў – вядомы беларускі і расійскі кінарэжысёр, сцэнарыст, акцёр і педагог – адносіцца да тых майстроў кіно, на фільмах якога выхоўвалася не адно пакаленне гледачоў.

Ён нарадзіўся ў с. Вясёлае Адлерскага раёна Краснадарскага краю (Расія). Вучыўся ў вячэрняй тэатральна-драматычнай студыі пры Рэспубліканскім рускім тэатры ва Улан-Удэ. Быў акцёрам у тэатрах Абакана і Разані. Потым паступіў на рэжысёрскі факультэт Усесаюзнага дзяржаўнага інстытута кінематаграфіі ў Маскве (майстэрня Л. Куляшова і А. Хахловай), які скончыў у 1968 г. З 1969 г. В. Нікіфараў працаваў на кінастудыі “Беларусьфільм”. У 1981 г. ён атрымаў высокае званне “Заслужаны дзеяч мастацтваў БССР”. На працягу 1986–1994 гг. з’яўляўся першым сакратаром праўлення, старшынёй, сустаршынёй Беларускага саюза кінематаграфістаў. Апошняя работа на “Беларусьфільме” – тэлефільм “Рэйнджэр з атамнай зоны” – датавана 1999 г. У пачатку 2000-х гг. рэжысёр быў запрошаны на працу ў Расію.

У гісторыю беларускага кіно В. Нікіфараў увайшоў як рэжысёр, які стварыў арыгінальныя змястоўныя мастацкія фільмы і тэлесерыялы, прысвечаныя гістарычнаму мінуламу нашай краіны, падзеям Вялікай Айчыннай вайны, сучаснаму стану грамадства, маральна-этычным праблемам. Рэжысёр імкнуўся рабіць сваё кіно максімальна даступным і відовішчным. Галоўнае правіла яго фільмаў – быць цікавымі для публікі. Сярод лепшых работ, створаных на “Беларусьфільме,” – “Зімародак” (1972), “Хлеб пахне порахам” (1974) і “Сын старшыні” (1976; за ўсё прэмія Ленінскага камсамола Беларусі 1978), “Абочына” (1978), “Высакародны разбойнік Уладзімір Дуброўскі” (паводле А. Пушкіна, 1989), “Душа мая Марыя” (1993) і інш. Вячаслаў Нікіфараў належыць да таго пакалення рэжысёраў, якія першымі пачалі выкарыстоўваць магчымасці “малога экрана” – ствараць карціны для тэлебачання. Яго тэлевізійныя фільмы “Бераг прынцэсы Люські” (1969), “Ціхія троечнікі” (1980), “Фруза” (паводле В. Быкава, 1981), “Бацькі і дзеці” (паводле І. Тургенева, 1984; Дзяржаўная прэмія СССР 1986), “Вялікая прыгода” (1985), “Дзяржаўная граніца” (фільм 5-ы – “Год сорок першы”, 1986) і іншыя карыстаюцца вялікай папулярнасцю ў аматараў кіно. Многія работы рэжысёра ўвайшлі ў залатую калекцыю беларускага кінематографа. Сярод фільмаў, знятых у Расіі, – “Капітанскія дзеці” (2006), “Знахар” (2008), “Каціна шчасце” (2014) і інш. Серыял “Кат” (2014), мастацкім кіраўніком якога з'яўляецца В. Нікіфараў, атрымаў прэмію “Залаты арол”.

Матэрыял падрыхтаваны ў 2022 г.