Фёдар Дзмітрыевіч Гахаў вядомы як вучоны-матэматык, адзін з заснавальнікаў беларускай школы па краявых задачах аналітычных функцый і сінгулярных інтэгральных ураўненнях.

Нарадзіўся ён у г. Чаркеску Стаўрапольскага краю (Расія) у сям'і рамесніка. Пасля заканчэння Чаркескага педагагічнага тэхнікума ў 1925 г. паступіў у Горскі педагагічны інстытут (г. Уладзікаўказ). У 1928 г. ён быў пераведзены ў Казанскі дзяржаўны ўніверсітэт, які скончыў у 1930 г. Чатыры гады Ф. Д. Гахаў выкладаў у розных навучальных установах Свярдлоўска. У 1934 г. ён паступіў у аспірантуру Казанскага дзяржаўнага ўніверсітэта. У 1937 г. абараніў кандыдацкую дысертацыю на тэму «Линейные краевые задачи теории аналитических функций». З 1937 па 1939 г. Ф. Д. Гахаў працаваў дацэнтам кафедры матэматычнага аналізу Казанскага дзяржаўнага ўніверсітэта, з 1939 па 1947 г. загадчыкам кафедры матэматычнага аналізу Паўночна-Асяцінскага педагагічнага інстытута, дзе два гады адначасова быў дэканам фізіка-матэматычнага факультэта. У гэты перыяд ён працягваў даследаванні ў галіне краявых задач і ў 1942 г. паспяхова абараніў доктарскую дысертацыю на тэму «Краевые задачи теории аналитических функций и сингулярные интегральные уравнения». У 1943 г. Ф. Д. Гахаву прысвоенна званне прафесара. З 1947 па 1953 г. выкладаў у Казанскім дзяржаўным універсітэце, дзе быў спачатку прафесарам кафедры матэматычнага аналізу, а затым загадчыкам кафедры дыферэнцыяльных ураўненняў. З 1953 па 1961 г. з'яўляўся загадчыкам кафедры дыферэнцыяльных ураўненняў Растоўскага дзяржаўнага ўніверсітэта. Тут вучоны разам з калектывам займаўся распрацоўкай розных праблем тэорыі краявых задач і сінгулярнасці інтэгральных ураўненняў.

З 1961 г. навукова-педагагічная дзейнасць Ф. Д. Гахава працягвалася ў Мінску ў Беларускім дзяржаўным універсітэце імя У. І. Леніна, дзе загадваў кафедрай матэматычнага аналізу, а затым кафедрай тэорыі функцый і функцыянальнага аналізу. У 1962–1963 гг. быў дэканам матэматычнага факультэта. У 1966 г. Ф. Д. Гахаў быў выбраны сапраўдным членам АН БССР. З 1975 г. ён з'яўляўся прафесарам-кансультантам кафедры тэорыі функцый БДУ.

Вучонаму належаць навуковыя даследаванні ў галіне тэорыі краявых задач і сінгулярных інтэгральных ураўненняў з адной і многімі пераменнымі, тэорыі інтэгральных ураўненняў тыпу скруткі, тэорыі адваротных краявых задач. Даў закончанае рашэнне асноўнай краявой задачы аналітычных функцый (задача Рымана) і інш. Працы Ф. Д. Гахава і яго вучняў атрымалі прызнанне ў СССР і за мяжой. Шырокае распаўсюджванне мае яго фундаментальная манаграфія «Краевые задачи» (1977, 3-е изд., перераб. и доп.). Другая, не менш значная манаграфія «Уравнения типа сверстки» была выдадзена ў 1978 г. (напісана разам з Ю. І. Чэрскім). Вучоным апублікавана больш за 50 навуковых работ.

Сваю дзейнасць Ф. Д. Гахаў паспяхова спалучаў з падрыхтоўкай навуковых кадраў. У многіх гарадах былога Савецкага Саюза паспяхова функцыянуюць навуковыя школы, створаныя Ф. Д. Гаховым і яго вучнямі. Вучоны выступіў ініцыятарам правядзення рэспубліканскіх навуковых канферэнцый матэматыкаў, завочных матэматычных алімпіяд школьнікаў Беларусі. Таксама займаўся грамадскай працай. Ен з'яўляўся членам Прэзідыума навукова-метадычнага савета Міністэрства вышэйшай і сярэдняй спецыяльнай адукцыі СССР, старшынёй секцыі матэматыкі і механікі навукова-метадычнага савета Міністэрства вышэйшай і сярэдняй спецыяльнай адукцыі БССР, членам рэдкалегій часопісаў «Весці АН БССР» і «Вестник БГУ».

За плённую навуковую, вучэбную і грамадскую дзейнасць Ф. Д. Гахаў узнагароджаны ордэнам Працоўнага Чырвонага Сцяга (1976), трыма медалямі, ганаровымі граматамі.

Матэрыял падрыхтаваны ў 2016 г.