Трахтэнберг Навум Яфімавіч

Date of Birth: 04.01.1910

Date of death: 16.10.1977

Quick reference: архітэктар, педагог, лаўрэат Дзяржаўнай прэміі Беларусі (1968)

Names in other languages: Трахтенберг Наум Ефимович (russian);

Трахтэнберг Навум Яфімавіч нарадзіўся ў г. Бахмач Чарнігаўскай вобласці (Украіна). З 1924 г. жыў у Адэсе, дзе спачатку скончыў будаўнічую прафшколу, а з 1928 па 1932 г. вучыўся на архітэктурным факультэце Адэскага інстытута грамадзянскага і камунальнага будаўніцтва. Пасля атрымання дыплома працаваў архітэктарам у адэскім філіяле «Гіпраграда» УССР. У кастрычніку 1934 г. па запрашэнні інстытута «Белдзяржпраект» пераехаў у Мінск і стаў праекціроўшчыкам. Удзельнічаў у распрацоўцы генеральных планаў і праектаў планіровак Бабруйска, Магілёва, Кіраўска, пасёлка Васілевіцкай ДРЭС.

У час Вялікай Айчыннай вайны быў прызваны ў Чырвоную Армію, але ў студзені 1942 г. па стане здароўя дэмабілізаваны. Уваходзіў у склад кіраўніцтва будаўніцтвам Чэлябінскага металургічнага завода «Чэлябметалургбуд», прымаў актыўны ўдзел у рабоце Саюза архітэктараў БССР, вёў перапіску з праўленнем саюза. У снежні 1942 г. быў удзельнікам пленума Праўлення Саюза архітэктараў БССР, дзе абмяркоўвалія пытанні падрыхтоўкі к аднаўленчым работам у Беларусі. У сакавіку 1944 г. яго прызначылі на пасаду начальніка аддзела планіроўкі і забудовы гарадоў Кіравання па справах архітэктуры пры СНК БССР.

З 1953 па 1956 г. быў кіраўніком майстэрні Генпрала ў інстытуце «Мінскпраект», адначасова ў 1954–1976 гг. выкладаў на архітэктурным аддзяленні ў Беларускім політэхнічным інстытуце (зараз Беларускі нацыянальны тэхнічны ўніверсітэт). Займаўся навукова-даследчай работай па пытаннях горадабудаўніцтва.

Найбольш значнымі праектамі, у распрацоўцы якіх прымаў удзел Н. Я. Трахтэнберг, лічацца генпланы Бабруйска (1936, 1939, 1949) і Магілёва (1939), праект дэталёвай планіроўкі Мінска (1939), генпланы аднаўлення і развіцця Мінска (1946, 1965), праект дэталёвай планіроўкі і забудовы часткі Ленінскага праспекта ў Мінску (1953, сумесна Г.В. Сысоевым, С.С. Мусінскім і інш.), праект забудовы цэнтральнай часткі Віцебска (1950), схема планіроўкі прыгараднай зоны Мінска (1964), праект планіроўкі зоны адпачынку ў раёне Заслаўскага вадасховішча (1968).

У 1968 г. за ўдзел у стварэнні архітэктурнага ансамбля Ленінскага праспекта ў Мінску (зараз праспект Незалежнасці) Н.Я. Трахтэнбергу была прысуджана Дзяржаўная прэмія БССР.

Матэрыял падрыхтаваны ў 2020 г.