Міхаіл Фёдаравіч Барздыка нарадзіўся ў в. Шклянцы Докшыцкага раёна Віцебскай вобласці. У 1973 г.скончыў архітэктурны факультэт Беларускага політэхнічнага інстытута (цяпер Беларускі нацыянальны тэхнічны ўніверсітэт). У 1976–1977 гг. выкладаў на гэтым жа факультэце. Вучыўся ў Маскоўскім паліграфічным інстытуце (1981 – 1986). З 1975 г. супрацоўнічае з беларускімі выдавецтвамі. Удзельнік мастацкіх выставак з 1976 г. Член Беларускага саюза мастакоў з 1990 г.

Працуе ў станковай (пераважна афорт) і кніжнай графіцы. “Яго стылю ўласцівае спалучэнне філасофскага і лірычнага светаразумення ў традыцыйных народных матывах”*, адзначае мастацтвазнаўца А. Ананьеў. Сярод яго твораў: “Метамарфозы” (1992), “Варыяцыі на тэму восені” (1994), “Падабенства” (1995), дыпціх “Аблокі і камяні” (1988), серыі “Асенняе люстэрка” (1994), “Вечнае святло”, “Высокае неба”, “Вобразы” (усе 1995), “Снежаньская сюіта”, “11 верасня” (абедзве 2003) і інш.

Знакавай падзеяй у творчай біяграфіі М. Барздыкі стаў удзел у падрыхтоўцы двух выдавецкіх праектаў у суаўтарстве з паэтам М. Башлаковым. Першае іх сумеснае выданне – кніга “Нетры” – было ажыццёўлена ў 2004 г. пры фінансавай падтрымцы Міністэрства інфармацыі Рэспублікі Беларусь. Яно выйшла ў свет на беларускай і рускай мовах (пераклад на рускую А. Цяўлоўскага). У анатацыі да кнігі адзначалася: “У гэтай незвычайнай кнізе праз выяўленчыя сродкі графікі вядомага беларускага мастака Міхася Барздыкі і тонкі лірызм і жывапіс паэтычнага слова Міхася Башлакова раскрываецца непаўторны вобраз Беларусі – хараство яе прыроды, шляхоў і абсягаў, багаты свет міфалагічных уяўленняў і персанажаў – усё тое, што з’яўляецца нетрамі шматвяковай народнай мудрасці і памяці, светапогляду і самасвядомасці, гонару кожнага беларуса”**. На Міжнародным кніжным кірмашы ў Франкфурце-на-Майне 2005 г. кніга “Нетры” атрымала высокую ацэнку і ўвайшла ў лік ста лепшых кніг свету (на кірмашы было прадстаўлена больш за 10000 выдавецтваў з 135 краін свету).

Другое сумеснае выданне М. Барздыкі і паэта М. Башлакова – кніга “Палын”, – прымеркаванае да 20-й гадавіны аварыі на Чарнобыльскай АЭС, было апублікована ў 2005 г. Вершы ў ім пададзены на трох мовах – беларускай, рускай і англійскай (пераклад на англійскую Т. Акушэвіч). Выданне атрымала на Міжнародным конкурсе графікі ў Бельгіі залаты медаль (2006).

Міхась Барздыка з’яўляецца лаўрэатам рэспубліканскіх і міжнародных конкурсаў “Мастацтва кнігі”. Ён ўзнагароджаны сярэбраным медалём Еўрапейскай Акадэміі мастацтваў (1992), залатым медалём на Міжнародным конкурсе графікі ў Валоніі (1993, Бельгія).

Яго творы знаходзяцца ў Нацыянальным мастацкім музеі Рэспублікі Беларусь, Рускім музеі (Санкт-Пецярбург), пінакатэцы Рыпэ Сан Жынэзіо (Італія), музеі сучаснага мастацтва “Шамольер” (Францыя), муніцыпальным музеі мастацтва г. Дзьер (Венгрыя).

Матэрыял падрыхтаваны ў 2014 г.

*Культура. 2006. 29 красавіка – 5 мая (№ 17). С. 9.

**Нетры. Графіка. Паэзія / Міхась Барздыка, Міхась Башлакоў. – Мінск, 2004. – С.2.