Лойка Леанід Вікенцьевіч

Date of Birth: 01.03.1944 Сакаўка, в., Смалявіцкі раён, Мінская вобласць

Date of death: 21.10.2007

Quick reference: вучоны-гісторык, палітолаг, публіцыст, дыпламат, педагог, даследчык гісторыі пасляваеннай Польшчы і іншых краін Цэнтральнай Еўропы, міжнародных адносін, заслужаны дзеяч культуры Польшчы

Names in other languages: Лойко Леонид Викентьевич (russian);

Леанід Вікенцьевіч Лойка нарадзіўся ў в. Сакаўка Смалявіцкага раёна Мінскай вобласці ў сям’і рабочых. У 1961‒1962 гг. працаваў станочнікам на Беларускім аўтамабільным заводзе. У 1970 г. скончыў гістарычны факультэт Беларускага дзяржаўнага ўніверсітэта імя У. І. Леніна (БДУ). З 1970 па 1980 г. працаваў выкладчыкам, дацэнтам кафедры новай і навейшай гісторыі, намеснікам дэкана гістарычнага факультэта БДУ. У 1974 г. абараніў кандыдацкую дысертацыю на тэму «Польский рабочий класс в период борьбы за социалистическую индустриализацию страны (1950‒1960 гг.)». У 1976 г. атрымаў вучонае званне дацэнта. За гады работы ва ўніверсітэце шмат зрабіў для навукова-метадычнага забеспячэння адукацыйнага працэсу. У 1981‒1986 гг. працаваў дырэктарам Дома савецкай навукі і культуры ў Варшаве, саветнікам Пасольства СССР у Польшчы. З 1986 па 1992 г. быў дацэнтам, прафесарам Мінскай вышэйшай партыйнай школы. З 1991 г. працаваў у БДУ на кафедры міжнародных адносін, з 1996 г. загадваў кафедрай дыпламатычнай і консульскай службы. У 2003 г. абараніў доктарскую дысертацыю на тэму «От коммунизма к социал-демократии: трансформация левой партии в Польше (1970‒2000 гг.)».

Леанід Вікенцьевіч ‒ аўтар навуковых прац, прысвечаных гістарычнай паланістыцы, ролі рабочага класа ў індустрыялізацыі Польскай Народнай Рэспублікі, гісторыі пасляваеннай Польшчы і іншых краін, станаўленню інстытутаў грамадзянскай супольнасці. Сярод іх ‒ «Бригады социалистического труда: из опыта стран социалистического содружества» (1980), «Мировая социалистическая система: даты, факты, комментарии» (1986, у суаўтарстве), «Испытание на прочность: общество польско-советской дружбы: становление, развитие» (1989), «Политическая борьба в Польше (70‒80 гг.)» (1994), «Новая социал-демократия. Трансформация левой партии в Польше» (2001) і інш. З’яўляецца аўтарам і рэдактарам вучэбных дапаможнікаў, даведнікаў для вышэйшых навучальных устаноў. У 1993‒1997 гг. быў галоўным рэдактарам часопіса «Беларуская мінуўшчына», у 2000‒2006 гг. ‒ часопіса «Вышэйшая школа». Гісторык прымаў удзел у арганізацыі міжнародных навуковых канферэнцый.

Вучоны з’яўляецца лаўрэатам Першай прэміі Усесаюзнага конкурсу студэнцкіх і аспіранцкіх прац, прысвечаных 100-годдзю У. І. Леніна (1970). У 1985 г. удастоены звання заслужанага дзеяча культуры Польшчы.

Матэрыял падрыхтаваны ў 2024 г.