Імя Яўгена Уладзіміравіча Паплаўскага добра вядома аматарам музыкі не толькі ў нашай краіне, але і далёка за яе межамі. Творы кампазітара – сімфанічныя, харавыя, камерна-інструментальныя і вакальныя – вызначаюцца высокім прафесійным майстэрствам, эмацыянальнасцю, выразнасцю, вытанчанасцю гучання.

Нарадзіўся Я. Паплаўскі ў г.п. Поразава Свіслацкага раёна Гродзенскай вобласці. Вучыўся ў мясцовай музычнай школе, потым у Гродзенскім музычным вучылішчы. Пад кіраўніцтвам вопытнага педагога В. Радзівонава пачаў пісаць першыя музычныя творы. У час службы ў арміі ў складзе вайсковага аркестра іграў на трамбоне. У 1982 г. Я. Паплаўскі паступіў у Беларускую дзяржаўную кансерваторыю (клас кампазіцыі І. Лучанка і Д. Смольскага), якую скончыў у 1986 г. У студэнцкія гады напісаў некалькі музычных твораў. Сярод іх – Саната для альта і фартэпіяна (1984), сімфанічная паэма «Quo vadis?» («Куды ідзеш?») (1985), кантата «Колокола моей Руси» на вершы А. Фета, М. Рубцова (1986), шэраг камерных сачыненняў і вакальных цыклаў на словы А. Пушкіна, Ю. Кузняцова, У. Салаўёва і інш. У 1991 г. Я. Паплаўскі скончыў асістэнтуру-стажыроўку Санкт-Пецярбургскай кансерваторыі пад кіраўніцтвам прафесара С. Сланімскага. Атрыманыя веды ўдасканальваў на курсах па кампазіцыі, дзе праслухаў лекцыі прафесара Парыжскай кансерваторыі Тон дэ Леёва, наведваў майстар-класы замежных кампазітараў. У Санкт-Пецярбургу напісаў сімфонію «Lux aeterna» для тэнара, хору і аркестра (словы Л. Эміліта, 1989) і сімфанічныя эскізы «Поразава» (1991).

Пасля заканчэння стажыроўкі Я. Паплаўскі вярнуўся ў Мінск. У 1991 г. па ініцыятыве кампазітара быў арганізаваны Міжнародны фестываль сучаснай камернай музыкі, які праводзіўся кожныя два гады да 1995 г. У гэты час ён напісаў некалькі розных па жанры твораў. Сярод іх – «Навела» для гітары і струннага квартэта з керамічнымі званочкамі (1991), камерна-інструментальны твор «Падсвядомасць» (1993), камерны балет «Людзі святла месяца» (1995), партытура для сімфанічнага аркестра «Dea Luna» (1996) і інш. Кампазітар цікавіўся гісторыяй музычнага мастацтва Бeлapyci і ў 1992 г. стаў адным з заснавальнікаў творчага калектыву «Беларуская капэла» (да 1996 г. яго дырэктар), мэтай якога з’яўляліся пошук, вывучэнне старадаўняй беларускай музыкі, прапаганда сучаснай, у тым ліку авангарднай. Яўген Паплаўскі працаваў у бібліятэках Лондана, Кракава, Варшавы, Познані, Гданьска i Санкт-Пецярбурга. Знойдзеныя музычныя творы Міхала Клеафаса і Міхала Казіміра Агінскіх, Э. Ванжуры, Я.Д. Голанда, В. Казлоўскага, Ю. Крашэўскага, С. Манюшкі, Ф. Міладоўскага, М. Радзівіла ўвайшлі ў рэпертуар штогадовага фестывалю «Адраджэнне беларускай капэлы» (арганізаваны ў 1991 г.). Яўген Паплаўскі з’яўляецца таксама аўтарам сцэнарыя балета «Тэагонія» (паводле Гесіёда, VIII ст. да н. э.). Па яго драматургічнай ідэі ў 1995 г. быў пастаўлены балет «Паланэз» на музыку Mіхала Клеафаса Агінскага.

З 1997 па 1999 г. кампазітар стажыраваўся ў Гданьскай акадэміі музыкі імя С. Манюшкі, потым у студыі электраакустычнай музыкі пры Кракаўскай акадэміі музыкі (1999, 2002). У гэты перыяд былі напісаны харавыя цыклы «Пагода ўжо позняй восені» на вершы Л. Стафа (1998), «Супрасльскай мадонне» на тэксты з Супрасльскага ірмалагіёна для хору без суправаджэння (1999), «Барбара Радзівіл» для сімфанічнага аркестра (1999), некалькі вакальных твораў на вершы А. Гаруна, М. Багдановіча, электронныя кампазіцыі «Карозія часу»і «Лунаючы ў прасторы». Супрацоўніцтва з польскімі музыкантамі і кампазітарамі працягвалася і ў наступныя гады. Інструментальныя творы Я. Паплаўскага «Святло на Шляху» (2000), «Шлях у Аблокі ІІ» (2002), «Маё-ёй» (2005) і іншыя выконваліся на фестывалях «Дні музыкі кракаўскіх кампазітараў» і «Варшаўская восень». Працягваючы даследаванне гісторыі беларускай музыкі, Я. Паплаўскі ў 2008 г. сумесна з Расійскай нацыянальнай бібліятэкай і Польскім інстытутам у Санкт-Пецярбургу заснаваў серыю нотных выданняў «Музычная спадчына Рэчы Паспалітай з Расійскай нацыянальнай бібліятэкі» (апублікавана 12 сшыткаў). Выпуск серыі – гэта спроба пазнаёміць усіх зацікаўленых з музычнай культурай Рэчы Паспалітай XVII–XIX стст. У 2011 г. у Нацыянальнай бібліятэцы Беларусі адбыўся канцэрт-прэзентацыя нотных выданняў «Музычная спадчына Рэчы Паспалітай з Расійскай нацыянальнай бібліятэкі». У рамках мерапрыемства прагучалі творы А. Абрамовіча, Н. Орды, Ф. Міладоўскага, К. Горскага, А. і М. Ельскіх і іншых кампазітараў у выкананні народнага артыста Беларусі, прафесара І. Алоўнікава, студэнтаў Беларускай дзяржаўнай акадэміі музыкі, навучэнцаў Рэспубліканскай гімназіі-каледжа пры Беларускай дзяржаўнай акадэміі музыкі.

Творы Я. Паплаўскага выконваліся на міжнародных фестывалях сучаснай музыкі і асобных канцэртах у Германіі, Нідэрландах, Даніі, Італіі, Іспаніі, Чэхіі, Украіне, Літве, Аргенціне, Бразіліі, Расіі і ЗША. Ён з’яўляецца лаўрэатам Рэспубліканскага конкурсу, прысвечанага 500-годдзю з дня нараджэння Ф. Скарыны (1991), міжнароднага конкурсу «Йіглава-2000» (Прага). Прымае ўдзел у розных канцэртных праграмах, праводзіць аўтарскія выступленні. У лістападзе 2016 г. у малой зале Беларускай дзяржаўнай філармоніі прайшоў канцэрт кампазітара пад назвай «Спрадвечнае святло», дзе быў выкананы твор для жаночага хору без суправаджэння на кананічныя лацінскія тэксты «Missa brevis» (2015), прысвечаны знакамітаму польскаму дырыжору С. Краўчыньскаму. У 2017 г. адбыўся творчы вечар Я. Паплаўскага «Адценні хараства», на якім Дзяржаўнай акадэмічнай харавой капэлай імя Р. Шырмы і харавымі калектывамі Мінскага дзяржаўнага музычнага каледжа імя М.І. Глінкі выконваліся творы кампазітара. Яўген Паплаўскі з’яўляецца таксама аўтарам артыкулаў пра Н. Орду, А. Абрамовіча, Юзафа Ігнацыя і Каятана Крашэўскіх.

Матэрыял падрыхтаваны ў 2019 г.