Падокшын Сямён Аляксандравіч

Date of Birth: 08.03.1931 Гомель, г.

Date of death: 21.12.2004

Quick reference: вучоны-філосаф і гісторык-медыявіст, культуролаг, лаўрэат Дзяржаўнай прэміі Беларусі (1984)

Names in other languages: Подокшин Семён Александрович (russian);

Сямён Аляксандравіч Падокшын нарадзіўся ў Гомелі. Вучыўся ў Брэсцкім педагагічным вучылішчы. У 1953 г. скончыў Мінскі педагагічны інстытут імя А.М. Горкага. Пасля атрымання дыплома з 1953 па 1954 г. працаваў настаўнікам сярэдняй школы ў г. Тураве. З 1957 па 1960 г. займаўся ў аспірантуры пры кафедры ўсеагульнай гісторыі Мінскага педагагічнага інстытута імя А.М. Горкага. З 1960 г. працаваў малодшым навуковым супрацоўнікам у Інстытуце філасофіі і права Акадэміі навук БССР. У 1965 г. абараніў кандыдацкую дысертацыю на тэму «Радикально-реформационное движение в Белоруссии и Литве (вторая половина XVI в.)». У 1966 г. выбраны старэйшым навуковым супрацоўнікам, зацверджаны на пасадзе ў 1969 г. У 1987 г. С.А. Падокшыну прысвоена вучоная ступень доктара філасофскіх навук пасля абароны дысертацыі на тэму «Философская и общественно-политическая мысль эпохи Возрождения в Белоруссии». У 1988 г. ён быў прызначаны на пасаду вядучага навуковага супрацоўніка Інстытута філасофіі Акадэміі навук БССР.

Сямён Аляксандравіч – аўтар шматлікіх навуковых прац, прысвечаных гісторыі філасофскай і грамадска-палітычнай думкі Беларусі эпохі Адраджэння і Рэфармацыі. Сярод іх – «Реформация и общественная мысль Белоруссии и Литвы (вторая половина XVI – начало XVII в.» (1970), «Скорина и Будный: очерк философских взглядов» (1974), «Франциск Скорина» (1981), «Філасофская думка эпохі Адраджэння ў Беларусі: ад Францыска Скарыны да Сімяона Полацкага» (1990), «Памятники философской мысли Белоруссии ХVII – первой половины ХVIII в.» (у суаўтарстве, 1991), «Унія. Дзяржаўнасць. Культура: філасофска-гістарычны аналіз» (1998), «Іпацій Пацей: царкоўны дзеяч, мысліцель, пісьменнік на пераломе культурна-гістарычных эпох» (2001), «Беларуская думка ў кантэксце гісторыі і культуры» (2003), «Этычная думка ў культуры Беларусі XVI-XVII стст.» (2004) і інш.

У 1984 г. С.А. Падокшын стаў лаўрэатам Дзяржаўнай прэміі БССР за цыкл работ па гісторыі філасофскай і грамадска-палітычнай думкі Беларусі. У 1993 г. узнагароджаны медалём Францыска Скарыны. У 2000 г. за навуковы ўклад у сацыяльна-эканамічнае развіццё краіны вучоны атрымаў стыпендыю Прэзідэнта Рэспублікі Беларусь.

Матэрыял падрыхтаваны ў 2021 г.