Камінскі Уладзімір Уладзіміравіч

Date of Birth: 18.04.1950 Цна, в., Мінскі раён

Quick reference: спартсмен і трэнер (веласпорт), заслужаны майстар спорту СССР, чэмпіён ХХІ Алімпіяды (Манрэаль, 1976), чэмпіён свету (1977), чэмпіён СССР (1976, 1977, 1978, 1980), кавалер ордэна "Знак Пашаны"

Names in other languages: Kaminski Vladimir (undetermined); Каминский Владимир Владимирович (russian);

Уладзімір Камінскі нарадзіўся 18 красавіка 1950 года ў вёсцы Цна Мінскага раёна Мінскай вобласці. Два яго старэйшыя браты займаліся веласпортам, таму была магчымасць паспрабаваць сябе ў яздзе на самым сапраўдным гоначным веласіпедзе. Аднак веласпортам ён захапіўся не адразу.

Пасля заканчэння васьмі класаў, юнак паступіў у Мінскі электратэхнікум сувязі. На першым курсе Уладзімір Камінскі запісаўся ў секцыю лыжных гонак і нават выканаў нарматыў 2–га разраду. Аднак пазней усё ж пайшоў па слядах старэйшых братоў. У 1967 годзе ён прыйшоў у мінскае ДСТ "Спартак" у секцыю веласпорту. На той момант будучаму алімпійскаму чэмпіёну было ўжо 17 гадоў, узрост, у якім многія спартсмены ўжо заканчваюць кар'еру.

Пасля перамог на розных дзіцячых і юнацкіх спаборніцтвах Уладзіміра Камінскага заўважыў вядомы трэнер і аўтарытэтны спецыяліст па веласпорце Леанід Корбут. У 1970–1971 гг. Камінскі пачаў выступаць на рэспубліканскіх і ўсесаюзных спаборніцтвах у камандзе з Мікалаем Дзмітруком, Вікенціем Баско і Міхаілам Зорыным. У 1973 г. на маладога таленавітага беларуса звярнуў увагу алімпійскі чэмпіён гульняў у Рыме 1960 года і галоўны трэнер зборнай СССР Віктар Арсеньевіч Капітонаў, які запрасіў Уладзіміра Камінскага на спартыўна-трэніровачныя зборы нацыянальнай каманды.

Пасля трох гадоў абкаткі і трэніровак Камінскі увайшоў у склад каманды СССР на наступныя гульні XXI Алімпіяды ў Манрэалі ў 1976 годзе. Барацьбу на 100-кіламетровай дыстанцыі за каманду СССР вялі эстонец Аава Піккуус, расіянін Валерый Чаплыгін, украінец Анатоль Чуканаў і беларус Уладзімір Камінскі. Незадоўга да ад'езду ў Манрэаль, айчынны спартсмен атрымаў траўму, аднак, урачам удалося паставіць яго на ногі. У Манрэалі камандзе СССР удалося выйграць алімпійскае "золата", апярэдзіўшы польскую зборную на цэлых 20 секунд!

На Алімпіяду–80, якая праходзіла ў Маскве, Уладзімір Камінскі не трапіў, хоць чэмпіянат СССР выйграла менавіта яго чацвёрка. Сам Уладзімір Уладзіміравіч казаў, што саступіў месца маладым, каб і тыя маглі выйграць сваё алімпійскае "золата".

Пасля заканчэння спартыўнай кар'еры адслужыў у войску, а пазней абараніў кандыдацкую дысертацыю на тэму: “Методыка падрыхтоўкі веласіпедыстаў у каманднай гонцы”.

У цяперашні час Уладзімір Камінскі выкладае на кафедры веласіпеднага, канькабежнага і коннага спорту ў Беларускім дзяржаўным універсітэце фізічнай культуры.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.