З імем Тамары Рыгораўны Раеўскай перш за ўсё звязана беларуская эстрадная песня, якая, з прыходам спявачкі на рэспубліканскае тэлебачанне і радыё, зазіхацела новымі фарбамі. У спевах артысткі адчувалася індывідуальнасць выканаўцы, сур'ёзнае стаўленне да тэксту і музыкі, талент інтэрпрэтатара.

Тамара Раеўская нарадзілася ў г. Асіповічы (Мінская вобласць). Пасля заканчэння школы паступіла на дырыжорска-харавое аддзяленне Маладзечанскага музычнага вучылішча. Тады яна не думала пра кар'еру спявачкі: пераехала ў Мінск, працавала рэгістратарам у адной з мінскіх клінік. Аднак ніколі не забывалася пра песню: спявала ў самадзейнасці, прымала ўдзел у творчых аглядах і фестывалях. У 1962 г. пасля ўдалага дэбюту ў адной з праграм эстраднага аркестра Беларускага тэлебачання і радыё Т. Раеўская стала салісткай гэтага калектыву. Хутка да яе прыйшоў поспех. У 1971 г., займаючыся канцэртнай дзейнасцю, Т. Раеўская скончыла Мінскае музычнае вучылішча імя М. Глінкі. Праз тры гады стала заслужанай артысткай БССР.

Тамара Рыгораўна Раеўская добра памятае сваё першае выступленне, якое адбылося ў Доме афіцэраў у Мінску. Сцэна Дома афіцэраў стала любімай пляцоўкай спявачкі. Потым былі канцэрты ў розных гарадах былога Савецкага Саюза і Беларусі. Яна спявала пра Радзіму, каханне, шчасце, пра памяць аб мінулым. Дыяпазон чалавечых пачуццяў, якія раскрываліся ў песнях, што выконвала Т. Раеўская, быў вельмі шырокім. У рэпертуар спявачкі ўвашлі песні беларускіх кампазітараў: Г. Вагнера, Я. Глебава, Я. Грышмана, І. Лучанка, Ю. Семянякі, Д. Смольскага, У. Алоўнікава і інш. З такім жа захапленнем і шчырасцю артыстка выконвала творы А. Пахмутавай, А. Бабаджаняна, А. Фельцмана, С. Тулікава і інш.

Трыццаць гадоў Т. Раеўская была салісткай аркестра Дзяржтэлерадыё Беларусі. У 1992 г. яна стала педагогам Дзяржаўнага канцэртнага аркестра Беларусі пад кіраўніцтвам выдатнага музыканта М. Фінберга. На працягу многіх гадоў Т. Раеўская вяла на рэспубліканскім радыё перадачу «Матчына песня», неаднаразова з поспехам выступала на Магілёўскім фестывалі «Залаты шлягер».

Матэрыял падрыхтаваны Магілёўскай абласной бібліятэкай імя У.І. Леніна ў 2013 г.