Яўген Анатольевіч Шыбнёў – адзін з дынастыі мастакоў Шыбнёвых, якая зарадзілася ў канцы XIX – пачатку XX ст.

Нарадзіўся Я.А. Шыбнёў 25 лютага 1935 г. у Адэсе, у сям'і мастакоў Т.Я. Разінай і А.Дз. Шыбнёва. Падчас Вялікай Айчыннай вайны быў з сям'ёй на акупіраванай тэрыторыі ў г. Брэсце, Беластоку. Пасля вайны займаўся ў Мінскім мастацкім вучылішчы ў С.П. Каткова, Беларускім дзяржаўным тэатральна-мастацкім інстытуце. Вучыўся ў В. Волкава, В. Цвірко, А. Малішэўскага. Працуе ў манументальным і станковым жывапісе, пераважна ў жанры пейзажа. Асноўныя творы: вітражы «Народнае свята» у кінатэатры «Аўрора», дзіцячым садзе Саўміна Беларусі (абодва ў Мінску); рэльеф «Шахцёры» і мазаіка для Палаца піянераў г. Светлагорска; афармленне экспазіцыі Уздзенскага краязнаўчага музея; выстаўкі «Адукацыя ў Беларусі» для павільёна ў Жэневе (Швейцарыя); палотны: «На Браслаўшчыне», «Возера Пацех», «Захад сонца на возеры», «Раніца», «Сонечны дзень», «На рацэ Волма», «Рака Іслач»; серыя «Браслаўшчына».

Творы Я. Шыбнёва знаходзяцца ў фондах Беларускага саюза мастакоў, у музеях Беларусі, прыватных калекцыях.

Матэрыял падрыхтаваны ў 2010 г.