Фёдар Віктаравіч Шастак нарадзіўся ў в. Харошча Івацэвіцкага раёна Брэсцкай вобласці. У 1974 г. скончыў Беларускі дзяржаўны тэатральна-мастацкі інстытут (цяпер Беларуская дзяржаўная акадэмія мастацтваў) па спецыялізацыі “Мастацкая кераміка і шкло”. Вучыўся ў Т. Паражняка, В. Гаўрылава. Яго дыпломны праект быў прысвечаны стварэнню керамічнага дэкаратыўнага пано для кафэ “Вясна” у Мінску. З 1973 г. стаў удзельнікам мастацкіх выставак. Член Беларускага саюза мастакоў з 1979 г.

У 1974–1978 гг. Ф. Шастак працаваў на Івянецкай фабрыцы мастацкай керамікі і вышыўкі. У 1977 г. за распрацоўку эталонаў керамічных вырабаў на гэтай фабрыцы мастак быў узнагароджаны сярэбраным медалём ВДНГ СССР. З 1979 г. ён працаваў у навукова-даследчай мастацка-эксперыментальнай лабараторыі Міністэрства мясцовай прамысловасці, у 1983–2002 гг. – на Барысаўскім камбінаце дэкаратыўна-прыкладнога мастацтва.

Сярод найбольш вядомых твораў: дэкаратыўная скульптура “Певень”, трыпціхі “Край мой родны”, “Івянецкія майстры”, “Зубр”, “Ікар”, “Пегас” (усе 1976), “Да зорак” (1978); дэкаратыўнае пано “Ураджай” (1992); дэкаратыўныя талеркі “Футбол” і “Варатар” (1975), “Чалавек і прырода” (1977); камплекты дэкаратыўных ваз “Квітнеючы сад”, “Бабіна лета”, “Салют” і дэкаратыўная кампазіцыя “Хваля” (усе 1978 – 1979); вазы, талеркі, свяцільнікі, каміны і інш.

Ён аформіў інтэр’еры рэстарана ў Талачыне (1982), кафэ Магілёўскага праектна-канструктарскага тэхналагічнага інстытута машынабудавання (1982 – 1983), Палаца культуры ў Светлагорску (1984), кафэ пры ўнівермагу ў Жодзіне (1985), сталовай шклозавода ў Барысаве (1986), сярэдніх школ №174 (1988) і № 185 (1989) у Мінску і інш. Фёдар Шастак выканаў каміны і печы для музея-сядзібы А. Міцкевіча ў в. Завоссе Баранавіцкага раёна Брэсцкай вобласці (1998), электракамін для Нацыянальнай бібліятэкі Беларусі (2006), вазы-кашпо для Палаца Незалежнасці (2013) і інш.

Творы Ф. Шастака знаходзяцца ў Нацыянальным мастацкім музеі Рэспублікі Беларусь, Музеі сучаснага выяўленчага мастацтва ў Мінску, фондах Беларускага саюза мастакоў, у галерэях і прыватных калекцыях.

Матэрыял падрыхтаваны ў 2015 г.