Ісаак Яфімавіч Маслан нарадзіўся ў Мінску. У 1941 г. скончыў Віцебскае мастацкае вучылішча, вучыўся ў І. Ахрэмчыка, Л. Лейтмана, В. Дзежыца. Удзельнік Вялікай Айчыннай вайны. Яго творы экспанаваліся з 1948 г. Працаваў у галіне афармленчага мастацтва, плаката, прамысловай графікі. Выканаў эскізы афармлення Усебеларускага фестывалю моладзі ў Мінску (1957), шэрагу спартыўна-масавых гімнастычных выступленняў, фізкультурных парадаў і Алімпійскіх гульняў (1980), Мінска да юбілейных дат (з 1946). Аформіў экспазіцыі ВДНГ БССР (1968, 1970), павільёна БССР на ВДНГ СССР (1949, 1954, 1969, 1982), беларускіх раздзелаў на нацыянальных выстаўках СССР за мяжой: у Лейпцыгу (1967, 1980), Плоўдзіве (1969, 1981), Познані (1975), Заграбе (1972), Дзюсельдорфе (1974), Багдадзе (1973), Нью-Дэлі (1976), Хельсінкі (1978), Ліёне (1982), Будапешце (1984) і інш. Сярод іншых работ – эскізы выкананых ім медалёў, плакаты (“Спорт – маладосць, сіла, прыгажосць”(1956), “За два мільёны фізкультурнікаў у Беларусі” (1963), “Спартсмены Беларусі! Памножым у Мехіка славу савецкага спорту” (1967), “За масавасць фізкультурнага руху” (1967) і інш.

І. Я. Маслан – член Беларускага саюза мастакоў з 1962 г. За вялікі ўклад у развіццё выяўленчага мастацтва і актыўны ўдзел у грамадскім жыцці ў 1981 г. яму было прысвоена ганаровае званне “Заслужаны работнік культуры БССР”.

Матэрыял падрыхтаваны ў 2011 г.