Ян Зноска нарадзіўся на Гродзеншчыне ў шляхецкай сям’і. Адукацыю атрымаў у Галоўнай школе Вялікага Княства Літоўскага ў Вільні. Сярод выкладчыкаў, якія аказалі значны ўплыў на фарміраванне светапогляду будучага філосафа былі тэолаг Т. Гусаржэўскі, натураліст Ж. Жылібер, правазнавец Г. Страйноўскі і інш. Скончыўшы навучанне са ступенню доктара вольных навук і філасофіі, Я. Зноска некаторы час настаўнічаў у Гродне. З 1802 г. у Віленскім універсітэце – быў ад’юнктам філасофіі, выкладчыкам палітэканоміі, ардынарным прафесарам, сакратаром універсітэта. У 1810–1824 гг. ён узначальваў кафедру палітычнай эканоміі, у 1827 г. абраны дэканам аддзялення маральных і палітычных навук.

Працуючы ва ўніверсітэце, Я. Зноска па заказе Адукацыйнай камісіі Рэчы Паспалітай пераклаў на польскую мову твор Э. Б. дэ Кандыльяка «Логіка» і адаптаваў яго для выкладання ў публічных школах. У 1808 г. вучоны быў накіраваны ў Парыж для грунтоўнага вывучэння палітычнай эканоміі з мэтай адкрыцця ва ўніверсітэце адпаведнай кафедры. Па вяртанні ў Вільню на аснове класічнага сачынення эканаміста А. Сміта «Даследаванне аб прыродзе і прычынах багацця народаў» (1776) ён распрацаваў і выдаў на польскай мове твор «Навука эканоміі палітычнай» (1811), які стаў выкарыстоўвацца ў якасці падручніка па палітычнай эканоміі. У далейшым ідэі свабоднай канкурэнцыі, прынцыпы асабістага прадпрымальніцтва і ініцыятывы былі выкладзены вучоным у арыгінальнай навуковай працы «Даследаванне пра палітычную эканомію, яе гісторыю і сістэмы» (1816). Акрамя гэтага ў 1822 г. Я. Зноска ўзначальваў камітэт па праверцы перакладу на рускую мову Статута Вялікага Княства Літоўскага 1588 г.

Матэрыял падрыхтаваны ў 2021 г.