Васіль Дзям'янавіч Ганчарэнка нарадзіўся ў Днепрапятроўску (Украіна). У 1955 г. закончыў Кіеўскую кансерваторыю (клас І. Патаржынскага). Працаваў салістам Пермскага тэатра оперы і балета (1955–1959), Музычнага тэатра імя К. Станіслаўскага і У. Неміровіча-Данчанкі ў Маскве (1959). З 1960 г. В. Ганчарэнка з'яўляўся салістам Дзяржаўнага тэатра оперы і балета БССР. Адначасова з 1980 г. выкладаў у Беларускай дзяржаўнай кансерваторыі, займаў пасаду загадчыка кафедры опернай падрыхтоўкі. У опернай студыі кансерваторыі паставіў спектаклі «Паяцы» і «Яўген Анегін» П. Чайкоўскага.

Спявак увасобіў шэраг вобразаў у операх беларускіх кампазітараў. Яркімі сатырычнымі фарбамі вызначаўся адмоўны персанаж Лявон Бурак са спектакля «Калючая ружа» Ю. Семянякі (1960). Сцэнічныя паводзіны героя былі прадуманы артыстам у дэталях: паходка, утрыраваная жэстыкуляцыя, ганарыстасць – усё было сатырычна завострана, але нідзе не пераходзіла ў наўмысны гратэск. Гэта роля была безумоўным поспехам выканаўцы. У новым сцэнічным варыянце оперы «Алеся» Я. Цікоцкага (1967) В. Ганчарэнка выканаў партыю Апанаса, у якой падкрэсліў гераічныя рысы свайго героя. Сярод роляў спевака ў нацыянальных творах – Лагоўскі («Яснае світанне» А. Туранкова), Платонаў («Сцежкаю жыцця» Г. Вагнера), сенатар Фаскары («Джардана Бруна» С. Картэса).

Запамінальным і выразным было выступленне артыста ў такіх ролях класічнага рэпертуару, як Яўген Анегін, Ялецкі, Раберт («Яўген Анегін», «Пікавая дама», «Іаланта» П. Чайкоўскага), Жэрмон («Травіята» Дж. Вердзі), Фігара («Севільскі цырульнік» Дж. Расіні), Малатэста («Дон Паскуале» Г. Даніцэці), Валянцін («Фаўст» Ш. Гуно), Эскамільё («Кармэн» Ж. Бізэ), граф Альмавіва («Вяселле Фігара» В.А. Моцарта).

Пераканаўчыя вобразы стварыў В. Ганчарэнка ў операх савецкіх кампазітараў – камісар Арцем'еў («Брэсцкая крэпасць» К. Малчанава), матрос Ілюша («Кастрычнік» В. Мурадэлі), Фердынанд («Заручыны ў манастыры» С. Пракоф'ева).

Творчае аблічча В. Ганчарэнкі вызначалі добрая вакальная школа, шчырасць у перадачы пачуццяў герояў, уменне ствараць каларытныя, характарныя, унутрана цэльныя вобразы. Спявак з'яўляўся лаўрэатам Усесаюзнага конкурсу на лепшае выкананне твораў М. Мусаргскага (1956).

Васіль Ганчарэнка вёў актыўную канцэртную дзейнасць, выступаў у Польшчы, ГДР, Венгрыі, Чэхаславакіі, Манголіі.

Матэрыял падрыхтаваны ў 2013 г.