Рахманько Яўген Міхайлавіч

Date of Birth: 25.08.1945 Заполле, в., Карэліцкі раён, Гродзенская вобласць

Date of death: 08.09.2018

Quick reference: вучоны ў галіне аналітычнай хіміі, педагог, заслужаны работнік БДУ

Names in other languages: Рахманько Евгений Михайлович (russian);

Яўген Міхайлавіч Рахманько нарадзіўся ў в. Заполле Карэліцкага раёна Гродзенскай вобласці. У 1969 г. скончыў хімічны факультэт Беларускага дзяржаўнага ўніверсітэта імя У. І. Леніна (БДУ). Працягнуў вучобу ў аспірантуры. У 1975 г. абараніў кандыдацкую дысертацыю на тэму «Некоторые закономерности экстракции ионных ассоциатов, образованных органическими основаниями и кислотами и их аналитическое применение». Працаваў на кафедры аналітычнай хіміі, спачатку асістэнтам, з 1979 г. ‒дацэнтам, з 1992 г. быў яе загадчыкам. У 1994 г. абараніў доктарскую дысертацыю на тэму «Физико-химические основы применения экстракции солями высших четвертичных аммониевых оснований в анализе». У 1996 г. атрымаў вучонае званне прафесара. З 2000 па 2006 г. з’яўляўся генеральным дырэктарам рэспубліканскага ўнітарнага прадпрыемства «Унітэхпрам БДУ».

Яўген Міхайлавіч ‒ аўтар каля 600 навуковых прац па пытаннях экстракцыйных працэсаў розных тыпаў, механізмаў функцыянавання вадкасных і плёначных аніёнселектыўных электродаў на аснове вышэйшых чацвярцічных амоніевых асноў. Сярод іх ‒ «Экстракция гомолов и их энергии гидратации» (1987, у суаўтарстве), «Пленочный хлоридселективный электрод на основе трихлормеркуриата тринонилоктадециламмония» (2000, у суаўтарстве) і інш. Вядомасць вучонаму прынесла даследаванне ў галіне аніёнаабменнай экстракцыі вышэйшымі чацвярцічнымі амоніевымі солямі, у выніку чаго створаны банк канстант абмену каля 200 мінеральных, арганічных і металакомплексных аніёнаў, распрацаваны арыгінальныя методыкі атрымання і ачысткі вышэйшых чацвярцічных амоніевых асноў і методыкі выяўлення канстант аніёнабменнай экстракцыі. Пад кіраўніцтвам Я. М. Рахманько ўпершыню арганізавана вытворчасць дыягнастычных матэрыялаў, неабходных для медыцынскіх біяхімічных даследаванняў у лячэбна-прафілактычных установах. Мае 100 патэнтаў на вынаходніцтвы. Акрамя навуковай займаўся педагагічнай дзейнасцю, адным з першых на хімічным факультэце ўкараняў у навучальны працэс электронныя адукацыйныя сістэмы.

У 2002 г. Яўген Міхайлавіч узнагароджаны ордэнам Францыска Скарыны. Ён удастоены звання «Заслужаны работнік Беларускага дзяржаўнага ўніверсітэта».

Матэрыял падрыхтаваны ў 2025 г.