Сцяпан Іванавіч Чарняк нарадзіўся ў вёсцы Чарневічы Барысаўскага раёна Мінскай вобласці ў сялянскай сям’і. Скончыў пачатковую школу.

Са студзеня 1917 г. служыў у рускай арміі, удзельнічаў у Першай сусветнай вайне. У сакавіку 1918 г. C.І. Чарняк стаў чырвонаармейцам. У 1921 г. скончыў Маскоўскія пяхотныя камандныя курсы і служыў памочнікам камандзіра роты пры Вышэйшым інстытуце палітскладу РСЧА ў Петраградзе, затым узначальваў кулямётную каманду стралковага палка ў Закаўказзі. Пасля заканчэння ў 1924 г. Ленінградскай пяхотнай школы камсаставу РСЧА Сцяпан Чарняк камандаваў стралковым батальёнам у Беларускай і Маскоўскай ваенных акругах. Удзельнічаў у нацыянальна-рэвалюцыйнай вайне ў Іспаніі, савецка-фінляндскай вайне 1939–1940 гг. Дывізія пад яго камандаваннем вызначылася пры прарыве “Лініі Манергейма”.

Указам Прэзідыума Вярхоўнага Савета СССР ад 7 красавіка 1940 г. за ўмелае камандаванне дывізіяй, узорнае выкананне баявых заданняў камандавання і праяўленыя пры гэтым адвагу і геройства Сцяпану Іванавічу Чарняку было прысвоена званне Героя Савецкага Саюза.

У маі 1941 г. С.І. Чарняк скончыў курсы Вышэйшага каманднага саставу пры Акадэміі Генеральнага штаба. У пачатку Вялікай Айчыннай вайны камандаваў арміяй на Закаўказскім, Крымскім, Калінінскім франтах. У баі 12 снежня 1942 г. быў цяжка паранены. Пасля выздараўлення зноў вярнуўся на Калінінскі фронт, удзельнічаў у Смаленскай наступальнай аперацыі. З кастрычніка 1943 г. Сцяпан Чарняк – камандзір Ноўгарад-Северскай стралковай дывізіі ў складзе 1-га Беларускага фронту. Байцы Чарняка паспяхова ўдзельнічалі ў Гомельска-Рэчыцкай і Калінкавіцка-Мазырскай наступальных аперацыях.

У студзені 1944 г. Сцяпан Іванавіч зноў быў цяжка паранены. Пасля вяртання ў строй на чале 41-й дывізіі ў складзе 1-га Беларускага фронту фарсіраваў Заходні Буг, Віслу, прайшоў усю Польшчу, удзельнічаў ва ўзяцці Берліна.

Пасля вайны С.І. Чарняк узначальваў упраўленне баявой і палітычнай падрыхтоўкі групы савецкіх войскаў у Германіі. Са жніўня 1947 г. кіраваў ваенным камісарыятам у Калінінскай вобласці, потым служыў у Краснадарскім краі. У 1958 г. С.І. Чарняк быў адпраўлены ў запас.

Узнагароджаны трыма ордэнамі Леніна, трыма ордэнамі Чырвонага Сцяга, двума ордэнамі Суворава ІІ ступені, ордэнам Кутузава ІІ ступені, а таксама замежнымі ўзнагародамі: ордэнам “Крыж Грунвальда” ІІІ класа (Польшча), ордэнам “Крыж храбрых” (Польшча), двума медалямі Польскай Народнай Рэспублікі.

Пераклад 2021 г. матэрыялаў інтэрнэт-праекта “Герои страны”.