Генадзь Іосіфавіч Гануш нарадзіўся ў в. Гута Уздзенскага раёна Мінскай вобласці. Пасля заканчэння Мар'інагорскага сельскагаспадарчага тэхнікума пачаў працаваць у саўгасе «Валасовічы» (Лепельскі раён Віцебскай вобласці). З 1959 па 1962 г. служыў у арміі. Пасля дэмабілізацыі знаходзіўся на гаспадарчай і партыйнай рабоце ў Пухавіцкім, Уздзенскім і Дзяржынскім раёнах Мінскай вобласці. У 1969 г. скончыў агранамічны факультэт Беларускай сельскагаспадарчай акадэміі. З 1974 па 1977 г. вучыўся ў аспірантуры Акадэміі грамадскіх навук пры ЦК КПСС (Масква), працаваў у партыйных органах. У 1990 г. прызначаны дырэктарам Беларускага навукова-даследчага інстытута агародніцтва (з 1992 г. адначасова з'яўляўся генеральным дырэктарам рэспубліканскага НВА «Элитсемовощ»). Кандыдатскую дысертацыю абараніў у 1977 г., доктарскую – у 1998 г. У лютым 1999 г. Г.І. Гануш быў абраны віцэ-прэзідэнтам Акадэміі аграрных навук Рэспублікі Беларусь, у 2003 г. стаў членам-карэспандэнтам НАН Беларусі.

Асноўнымі напрамкамі навуковай дзейнасці Г.І. Гануша з'яўляюцца праблемы павышэння эфектыўнасці прадпрыемстваў АПК, удасканаленне арганізацыйна-эканамічнага механізма функцыянавання агароднінна-прадуктовага падкомплекса, фарміраванне рынкаў харчавання, развіццё сельскагаспадарчай кааперацыі. У працах вучонага тэарэтычна абгрунтаваны метады ўдасканалення дзяржаўнага рэгулявання эканамічных адносін, распрацавана арганізацыйная структура гаспадарчага кіравання ў агароднінным падкомплексе АПК.

Спектр навуковых інтарэсаў Г.І. Гануша ахоплівае розныя аспекты эканамічнага і сацыяльнага развіцця вёскі. У даследаваннях і публікацыях вучонага знаходзяць адлюстраванне праблемы павышэння эфектыўнасці выкарыстання навукова-інавацыйнага патэнцыялу АПК, канкурэнтаздольнасці сельскагаспадарчай прадукцыі, кіравання вытворчасцю, развіцця аграпрамысловай інтэграцыі. Ён з'яўляецца аўтарам больш за 200 навуковых работ, у т.л. 5 манаграфій. З 2003 г. займаецца педагагічнай дзейнасцю: выладаў у Мінскім інстытуце кіравання, Беларускім дзяржаўным эканамічным універсітэце, з 2005 г. з'яўляецца загадчыкам кафедры эканамічнай тэорыі і права Беларускага дзяржаўнага аграрнага тэхнічнага ўніверсітэта (БДАТУ).

Генадзь Іосіфавіч Гануш актыўна ўдзельнічае ў навукова-грамадскай рабоце: уваходзіць у склад Дзяржаўнага экспертнага савета, з’яўляецца членам камісіі па прэміях НАН Беларусі. Плённая праца Г.І. Гануша адзначана ордэнам «Знак Пашаны», медалём «За працоўную доблесць», двума сярэбранымі медалямі ВДНГ, Ганаровай граматай Вярхоўнага Савета БССР, Ганаровай граматай Савета Міністраў Рэспублікі Беларусь, граматамі шэрагу міністэрстваў і ведамстваў.

Матэрыял падрыхтаваны Уздзенскай цэнтральнай раённай бібліятэкай (Мінская вобласць) у 2013 г.