Родам алімпійская чэмпіёнка з украінскага горада Роўна. З дзяцінства займалася спартыўнай гімнастыкай. У 13 гадоў па прапанове трэнераў з г. Нікалаева паспрабавала сябе ў лыжнай акрабатыцы. У 1992 г. Ала паступіла ў вучылішча фізічнай культуры ў Нікалаеве, паралельна займалася фрыстайлам. Ужо тады былі і першыя перамогі на юнацкіх чэмпіянатах свету.

На першую ў сваім жыцці Алімпіяду ў 1998 г. у японскім Нагана Ала Цупер паехала выступаць за зборную Украіны. Заваяваць медаль перашкодзіла траўма, аднак і пятае месца аказалася нядрэнным вынікам для пачатку. Сама Цупер лічыць, што калі б у 18 гадоў яна стала алімпійскім прызёрам, то ў яе не было б ужо імкнення развівацца далей. Пасля Алімпіяды ў Нагана Але Цупер і яшчэ некалькім спартсменам са зборнай Украіны было прапанавана выступаць за Беларусь. Спачатку спартсменка займалася ў школе па фрыстайле ў Гомеле, а ў 2001 г. пераехала ў Мінск, дзе працягнула трэніроўкі пад кіраўніцтвам Мікалая Казекі.

Ала Цупер прымала ўдзел у 5 зімовых Алімпіядах запар. У 2002 г. у Солт-Лейк-Сіці яна прыехала ўжо тытулаванай спартсменкай, бо ў той год выйграла малы «Крыштальны глобус». Медаль Алімпіяды аднак заваяваць не змагла з-за падзення ў самы адказны момант. На наступныя дзьве Алімпіяды ў Турыне у 2006 г. і Ванкуверы ў 2010 г. Ала Цупер паехала з траўміраваным каленам, таму зноў на станоўчы вынік не разлічвала. Пасля гульняў у Ванкуверы спартсменка вырашыла пакінуць вялікі спорт, выйшла замуж і нарадзіла дзіця. Аднак ужо праз 9 месяцаў пасля нараджэння дачкі вярнулася да трэніровак. Аднавіўшы патрэбную спартыўную форму, Цупер адправілася на зімовую Алімпіяду 2014 г. у Сочы. Менавіта там яна выканала свой пераможны скачок – трайное сальта з трыма вінтамі, які прынёс ёй залаты медаль.

На XXIII зімовых Алімпійскіх гульнях Пхенчхан-2018 на агульным сходзе беларускіх алімпійцаў была абрана сцяганосцам беларускай зборнай на цырымоніі адкрыцця. У Пхенчхане ў спаборніцтвах па фрыстайле паспяхова прайшла кваліфікацыю з другой спробы, набраўшы 99,37 балы. У суперфінале Ала Цупер заявіла найскладанейшы сярод удзельніц скачок. Аднак не змагла чыста выканаць яго і завяршыла выступленне ў адным кроку ад п’едэстала на 4-м месцы. За свае спартыўныя дасягненні спартсменка была ўзнагароджана ордэнам Айчыны III ступені.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.