Азёрны (з 2007 г. гідралагічны) заказнік рэспубліканскага значэння "Белае" быў створаны ў Глыбоцкім і Ушацкім раёнах Віцебскай вобласці ў 1979 г. Мэтай заснавання стала зберажэнне ў натуральным стане аднайменнага возера і прылеглых да яго ландшафтаў ледавіковага паходжання.

Ахоўная тэрыторыя плошчай 483 га размешчана на паўночным усходзе Свянцянскіх град у басейне р. Шошы. Большая частка заказніка ўкрыта лесам з хвоі, бярозы, шэрай і чорнай алешын. Асабліва каштоўнымі расліннымі суполкамі з’яўляюцца гаі бярозы карэльскай, а таксама ўчасткі яловых лясоў, якія разглядаюцца як генетычны банк елкі еўрапейскай. Сярод ахоўных прадстаўнікоў флоры – баранец звычайны, званочак персікалісты, чына гладкая, наперстаўка буйнакветная, дрэмлік цёмначырвоны, ліпарыс Лёзеля і інш. У складзе расліннасці глыбакаводнага Белага возера (найбольшая глыбіня 24 м) – трыснёг, чарот, харавыя водарасці, мох фантыналіс. У межах прыроднага комплексу ўстаноўлена пражыванне больш за 100 відаў наземных пазваночных. У возеры водзяцца лешч, судак, шчупак, акунь, краснапёрка, верхаводка. Па берагах маюцца паселішчы баброў, сустракаюцца гняздоўі вялікага крахаля, унесенага ў Чырвоную кнігу Рэспублікі Беларусь.

Заказнік з’яўляецца аб’ектам экалагічнага турызму. Для наведвальнікаў праводзяцца пешыя і водныя экскурсіі, абсталяваны месцы для адпачынку і экалагічная сцежка. Возера прыцягвае рыбаловаў-аматараў. У заказніку забаронена прамысловае рыбалоўства, узворванне зямлі бліжэй за 100 м ад берагавой лініі возера, здабыча торфу і сапрапелі.

Матэрыял падрыхтаваны ў 2023 г.