Музей-лабараторыя Францыска Скарыны быў створаны ў 1993 г. пры Гомельскім дзяржаўным універсітэце ў сувязі з прысваеннем гэтай установе 29 лістапада 1988 г. імя Ф. Скарыны. Ініцыятарам і адным з актыўных арганізатараў гэтай кампаніі быў тагачасны загадчык кафедры беларускай мовы, доктар філалагічных навук, заслужаны дзеяч навукі Беларусі, лаўрэат Дзяржаўнай прэміі Беларусі прафесар В. У. Анічэнка. Мэта створанага музея-лабараторыі – збор і даследаванне матэрыялаў пра дзейнасць і навуковую спадчыну беларускага і ўсходнеславянскага першадрукара, вучонага і асветніка, а таксама пра гісторыю самога ўніверсітэта.

У экспазіцыі музея-лабараторыі прадстаўлены навуковая і мастацкая літаратура, змяшчаюцца матэрыялы старадаўніх і эмігранцкіх публікацый, ксеракопіі або арыгіналы соцень скарыназнаўчых артыкулаў, у тым ліку з “касцёльнай энцыклапедыі” (1902, Польшча), публікацыі гісторыка П. Крачэўскага (1926, Прага). Маюцца мікрафільмы дзвюх кніг С. Полацкага, а таксама мікрафільм першай у свеце навуковай манаграфіі па творчасці першадрукара – кнігі П. У. Уладзімірава “Доктар Францыск Скарына. Яго пераклады, друкаваныя выданні і мова” (Санкт-Пецярбург, 1888). Сярод іншых “багаццяў” музея-лабараторыі можна знайсці відэафільмы пра Скарыну, матэрыялы пра К. Тураўскага і М. Гусоўскага, скарынаўскія партрэты ў выкананні мастакоў П. Сяргіевіча, Л. Шчамялёва, М. Басалыгі і іншых, працы скульптараў А. Глебава і Ю. Платонава. Таксама сабрана ўся паэзія, прысвечаная вучонаму, і створана комплексная інфармацыйна-бібліяграфічная база “Усё пра Ф. Скарыну”. На аснове матэрыялаў калекцыі даследчыкамі ў галіне скарыназнаўства пішуцца навуковыя працы і нарысы, рыхтуюцца хрэстаматыі і бібліяграфічныя зборнікі, друкуюцца артыкулы ў перыядычным друку. 3 удзелам музея-лабараторыі праводзяцца рэспубліканскія і міжнародныя навуковыя канферэнцыі.

Акрамя працы па збіранні скарыназнаўчых матэрыялаў супрацоўнікамі музея-лабараторыі праводзіцца праца і па даследаванні гісторыі ўніверсітэта. 80-гадовае развіццё ўстановы адлюстравана ў калекцыі фотаздымкаў (каля 1000 адзінак), ксеракопіях асабовых спраў рэктараў, пратаколах пасяджэнняў вучонага савета ўніверсітэта, архіўных выпісках па развіцці ўстановы, успамінах былых выкладчыкаў і супрацоўнікаў, а таксама ў шматлікіх іншых матэрыялах. У анатаваным бібліяграфічным даведніку “Навуковыя працы выкладчыкаў і супрацоўнікаў ГДУ імя Ф. Скарыны” сабраны сотні падручнікаў, манаграфій і навуковых артыкулаў выкладчыкаў універсітэта.

Першая экспазіцыя музея-лабараторыі была ўрачыста адкрыта 15 мая 1993 г. За яго амаль 20-гадовую дзейнасць для больш чым 17 тысяч наведвальнікаў са шматлікіх краін свету праведзена больш за 1000 калектыўных і індывідуальных экскурсій, практычных, семінарскіх і лекцыйных заняткаў.

Матэрыял падрыхтаваны Гомельскай абласной універсальнай бібліятэкай імя У. І. Леніна ў 2011 г.