У 1958 г. пры Беларускім аўтамабільным заводзе (БелАЗ) у г. Жодзіна быў адкрыты філіял Мінскага аўтамеханічнага тэхнікума. З 1 кастрычніка 1959 г. пачалі заняткі дзве групы навучэнцаў па спецыяльнасці «Халодная апрацоўка металаў рэзаннем». Займаліся пазменна (не было пастаяннага памяшкання і не хапала літаратуры). Вучыліся таксама ў палацы культуры БелАЗа, сярэдняй школе № 2, на заводзе. Філіялам загадвалі: В.В. Чуднікава, С.В. Машковіч, В.В. Якаўлеў. Першымі выкладчыкамі сталі настаўнікі школ і інжынерныя кадры аўтазавода. За перыяд з 1959 па 1973 г. філіял выпусціў каля 400 спецыялістаў сярэдняга звяна, якія ўнеслі вялікі ўклад у развіццё БелАЗа. За выдатную працу многія з іх былі ўзнагароджаны ордэнамі і медалямі.

У сувязі з развіццём завода было прынята рашэнне стварыць на базе філіяла політэхнікум. 23 красавіка 1973 г. быў падпісаны загад № 175 Міністэрства вышэйшай і сярэдняй спецыяльнай адукацыі БССР аб стварэнні Жодзінскага дзяржаўнага політэхнікума (ЖДПК). З 1 верасня пачаліся заняткі на дзённым і вячэрнім аддзяленнях. Узначаліў тэхнікум В.В. Якаўлеў. З 21 студзеня 1974 г. дырэктарам тэхнікума быў прызначаны канструктар завода П.А. Талерчык.

У 1975 г. навучальную ўстанову перадалі ў распараджэнне Міністэрства аўтамабільнай прамысловасці СССР, базавым прадпрыемствам для яе стаў БелАЗ. З дапамогай аўтамабілебудаўнікоў за кароткі час было створана некалькі кабінетаў і лабараторый, навучальна-вытворчыя майстэрні, пабудаваны інтэрнат, спартыўная зала, якая стала спартыўным цэнтрам горада. У 1980-х гг. працягвалася ўдасканаленне навучальна-матэрыяльнай базы, ішло забеспячэнне тэхнікай, станкамі з праграмным кіраваннем, уводзіліся новыя спецыяльнасці.

З 1992 г. тэхнікум зноў увайшоў у сістэму Міністэрства адукацыі Рэспублікі Беларусь. З 1994 г. дзейнічае навучальна-навуковае аб'яднанне ЖДПК – БНТУ (Беларускі нацыянальны тэхнічны ўніверсітэт), якое дазваляе лепшым выпускнікам працягваць навучанне ў гэтай установе па скарочанай праграме. 12 лютага 2008 г. тэхнікум атрымаў статус каледжа.

Сёння Жодзінскі палітэхнічны каледж рыхтуе спецыялістаў сярэдняга звяна на бюджэтнай і платнай аснове па наступных спецыяльнасцях: «Тэхналогія машынабудавання», «Металарэжучыя станкі і інструменты», «Мантаж і эксплуатацыя электраабсталявання», «Машыны і тэхналогія апрацоўкі матэрыялаў ціскам», «Бухгалтарскі ўлік, аналіз і кантроль», «Эканоміка і арганізацыя вытворчасці», «Тэхналагічная падрыхтоўка і наладка станкоў і маніпулятараў з праграмным кіраваннем». Матэрыяльная база каледжа ўключае слясарную, такарную, фрэзерную, электрамантажную і іншыя майстэрні, некалькі лабараторый. За час існавання ўстановы падрыхтавана больш за 8000 спецыялістаў, многія з якіх атрымалі вышэйшую адукацыю і паспяхова працуюць на БелАЗе, Кавальскім заводзе цяжкіх штамповак (Жодзіна) і іншых прадпрыемствах горада і рэспублікі.

Матэрыял падрыхтаваны Жодзінскай цэнтральнай гарадской бібліятэкай у 2013 г.