Заслужаны аматарскі калектыў Рэспублікі Беларусь харэаграфічны ансамбль “Рунь” створаны ў студзені 1983 г. пры Доме культуры Магілёўскага вытворчага аб’яднання шаўковых тканін імя XXV з’езда КПСС. Званне “народны” калектыву было прысвоена ў 1989 г., “заслужаны” – у 2005 г. Заснавальнікам, мастацкім кіраўніком і пастаноўшчыкам танцаў выступае Віктар Аляксеевіч Папоў, які за сваю шматгадовую творчую працу быў узнагароджаны медалём Францыска Скарыны (2010).

Ансамбль складаецца з танцавальнай i інструментальнай груп. Мае самабытныя народныя інструменты: ліру, гудок, кмен, жалейкі i інш. У рэпертуары калектыву сцэнічныя варыянты танцаў, заснаваныя на самабытных узорах фальклору розных рэгіёнаў Беларусі. Ансамбль імкнецца захаваць лепшыя традыцыі беларускай танцавальнай культуры, даследуе i апрацоўвае рэгіянальны i старадаўні харэаграфічны i музычны фальклор. Пастаноўка танцаў ажыццяўляецца на матэрыяле даследчыкаў фальклору i сабранага ў экспедыцыях В. А. Паповым. Сярод танцаў “Варатынская кадрыля”, “Падушачка”, “Хаханькі з брылямі”, “Таўкачыкі”, карагоды “Званочкі”, “Ляляшы” i iнш.

З’яўляючыся папулярызатарам беларускага танца, ансамбль не абмяжоўвае сябе рамкамі адной нацыянальнай традыцыі. У яго рэпертуары маецца шэраг танцаў народаў свету. Гэта харэаграфічны малюнак па матывах рускіх гульняў “Зімачка”, украінскі народны танец “Паўзунец”, калмыцкі танец “Чычырдык”, сюіта па матывах фальклорных танцаў народаў Далёкага Усходу, балівійскія “Сараро”, “Куэка”, калумбійскі “Кумбія” і інш.

“Рунь”– лаўрэат i дыпламант больш 30 рэспубліканскіх i міжнародных конкурсаў i фестываляў: у Італіі (г. Гарыцыя, 1992, Гран-пры), Германіі (г. Марбург, 1996), Іспаніі (г. Барселона, 2000); Беларусі: 1-гa Міжнароднага фестывалю харэаграфічнага мастацтва “Сожскі карагод” (г. Гомель, 1997), 1-га фестывалю народнага мастацтва Беларусі “Беларусь – мая песня” (Мінск, 1998), Міжнароднага агляду-конкурсу “Зямля пад белымі крыламі” (Мазыр, 2001, Гран-пры) і інш.

Пры ансамблі працуе дзіцячая харэаграфічная студыя “Зярнятка” (кipaўнік Т. Папова). Творчасці калектыву прысвечаны дакументальны фільм Магілёўскага тэлебачання “Танцуе “Рунь”.

Матэрыял падрыхтаваны Магілёўскай абласной бібліятэкай імя У. І. Леніна ў 2011 г.