Чачэрскі гісторыка-этнаграфічны музей, ДУК

Start date: 01.07.1990 Чачэрск, г., Гомельская вобласць

Quick reference: дзяржаўная ўстанова культуры

Names in other languages: Chachersk Historico-Ethnic Museum (undetermined); Чечерский историко-этнографический музей (russian);

Чачэрскі гісторыка-этнаграфічны музей заснаваны 01.07.1990 г. паводле рашэння Чачэрскага райвыканкама ў г. Чачэрск Гомельскай вобласці, адкрыты для наведвальнікаў у верасні 2004 г. З 2005 г. музей размешчаны у будынку ратушы – помніку архітэктуры XVIII ст.

Асноўны фонд музея складаюць 18 563 адзінкі захоўвання. Дзейнічаюць экспазіцыйныя залы “Археалогія”, “Іканапіс”, “Этнаграфія”, “Чачэрскі край у складзе Расійскай Імперыі”, “Эканамічнае развіццё краю (другая палова XVIII – пачатак ХХ ст.)”, “Мемарыяльная зала графаў Чарнышовых”, “Рэха Чарнобыля”.

Каштоўнасцямі музея з’яўляюцца археалагічныя знаходкі і прадметы даўніны: фрагменты касцей і біўня маманта, ляпныя гаршкі эпохі неаліту, крамянёвыя прылады працы з раскопак на Бердыжскай палеалітычнай стаянцы, жаночыя ўпрыгожанні, медальён-змеявік ХІІІ ст., ключ ад брамы Чачэрскага замка, калекцыі папяровых і медных грошай Расійскай Імперыі, тульскіх самавараў, народных касцюмаў і ручнікоў, старадрукі і інш. З твораў мастацтва выдзяляецца калекцыя абразоў XVIII – ХІХ ст. У студзені-лютым 2014 г. асобныя творы з гэтай калекцыі экспанаваліся ў Нацыянальным мастацкім музеі Рэспублікі Беларусь на выстаўцы "Бог сялянскі і хрысціянскі. Бабіцкая ікона". Гэта быў сумесны праект Нацыянальнага мастацкага музея Рэспублікі Беларусь, Веткаўскага музея стараабрадніцтва і беларускіх традыцый імя Фёдара Шклярава і Чачэрскага гісторыка-этнаграфічнага музея.

Сярод экспанатаў музея маюцца матэрыялы часоў рэвалюцыі 1905–1907гг., пра стварэнне і дзейнасць падполля і партызанскага руху на тэрыторыі раёна ў Вялікую Айчынную вайну, землякоў Герояў Савецкага Саюза М. С. Байкова, М. К. Круглікава, А. І. і П. І. Лізюковых, Ц. П. Новікава, удзельнікаў вайны ў Афганістане 1979–1989 гг.

Асноўнымі формамі работы музея з’яўляюцца экскурсіі, музейна-педагагічныя заняткі, лекцыі, вечары-сустрэчы, інтэрактыўныя заняткі, фальклорныя святы. У музеі праводзяцца часовыя выстаўкі мясцовых майстроў, мастакоў і скульптараў. Супрацоўнікі музея ўдзельнічаюць у рабоце навукова-практычных канферэнцый.

Матэрыял падрыхтаваны ў 2015 г.