Гісторыя ЗАТ “Маладзечнамэбля” пачалася ў 1954 г. са стварэння на базе сталярнага цэха мясцовага прамкамбіната ў Маладзечна (Мінская вобласць) мэблевай фабрыкі. Налічвала яна тады каля 50 чалавек і была аснашчана 11 станкамі. Першай яе прадукцыяй сталі сталы, шафы, вокны, дзверы, дробныя сталярныя вырабы і cпружынныя матрацы. У 1963 г. да прадпрыемства далучана Вілейская мэблевая фабрыка, якая дзейнічала з 1954 г. у выглядзе арцелі імя Маленкова. У 1960-я гг. на прадпрыемстве працягваліся абнаўленчыя працэсы: былі ўведзены гарачае абліцоўванне шчытоў, лакіроўка метадам наліву, механізаваная паліроўка. У структуры пачалі працаваць новыя аддзелы (машынна-фанеравальны цэх, вытворча-тэхнічны аддзел, лабараторыя), колькасць работнікаў павялічылася да 1,2 тыс. чалавек. У 1970 г. прадпрыемства рэарганізавана ў вытворчае мэблевае аб’яднанне, куды ўваходзілі Маладзечанская і Вілейская мэблевыя фабрыкі і Смаргонскі лесазавод. Былі пабудаваны новыя цэхі і ўстаноўлена новае для таго часу абсталяванне, якое забяспечыла высокую прадукцыйнасць і якасць прадукцыі. Тэхнічнае пераўзбраенне дазволіла карэнным чынам змяніць асартымент прадукцыі, асвоіць праектаванне і выпуск мэблі з натуральнай драўніны, наборы мэблі ўніверсальна-зборнай канструкцыі.

У цяперашні час закрытае акцыянернае таварыства “Маладзечнамэбля” ўваходзіць у склад канцэрна “Беллеспаперапрам”. Яно выпускае больш за 500 відаў і мадыфікацый мэблі з натуральных матэрыялаў (масіву дубу, вольхі, буку, натуральнай скуры): наборы для спальні, гасцінай, прыхожай, сталовай, кухні, наборы мяккай мэблі і інш. Прадпрыемства мае ўласную гандлёвую сетку, экспартуе сваю прадукцыю ў краіны Еўропы і СНД. Прадукцыя з’яўляецца пастаянным удзельнікам міжнародных і нацыянальных выставак і конкурсаў. За высокія паказчыкі працы ЗАТ “Маладзечнамэбля” ўдастоена Прэміі Урада Рэспублікі Беларусь за дасягненні ў галіне якасці (2005, 2010, 2015).

Матэрыял падрыхтаваны ў 2024 г.